5000 жилийн түүхтэй хот олдлоо

Туркийн төв нутгийн Каппадокия мужаас газар доорх нэг хот олж илрүүлсэн нь өнөөдөр манай дэлхий дээр мэдэгдэж байгаа газар доорх хотуудаас хамгийн том нь юм. Тус хот 5000 гаруй жилийн өмнө баригджээ.

Каппадоки нь Туркийн нийслэл Анкарагаас 250 орчим км-т орших, НҮБ-ын Соёл боловсрол, шинжлэх ухааны байгууллага ЮНЕСКО-гийн дэлхийн өвд орсон галт уулсын нутаг, түүхийн дурсгалт байгалийн үзэсгэлэнт газар юм.

Энэ хотыг Невшехир хотын хэрмийн ойролцоо барилгын ажил хийж байсан хүмүүс олж илрүүлжээ. Хотын даргын хэлснээр бол газар доорх энэ хотын нийт талбай нь өмнө олдож байсан газар доорх хотуудынхаас илүү том гэнэ. Туркийн орон сууцны барилгын газрын тэргүүн Мехмет Туран “Уг хотыг барилгын суурь ухаж байсан барилгачид олсон. Урьдчилсан тооцоогоор газар доор байсан энэ галларей долоон км-ээс багагүй урттай байсан. Тэгээд л бид ийм дурсгалт зүйлийг устгахгүйн тулд 90 сая доллараар үнэлэгдэх төслөө зогсоогоод байна. Газар доорх энэ хот зөвхөн Туркт ч биш, дэлхийд томд орох хот” гэж мэдэгджээ.