52 дугаар сургууль физикийн лаборатори кабинеттай боллоо

“Хүүхдэд ээлтэй Хан-Уул” хөтөлбөрийн хүрээнд 2014-2015 оны хичээлийн жилд Нийслэлийн Хан-Уул дүүргийн ерөнхий боловсролын 52 дугаар сургуульд 29.925.000 төгрөгийн хөрөнгө оруулалтаар шинээр “Физик”-ийн лаборатори кабинетыг ашиглалтад оруулж өчигдөр нээлтээ хийлээ. Нээлтийн үйл ажиллагаанд ХУД-ийн Засаг дарга Ж.Ганхуяг, Нийгмийн хөгжлийн хэлтсийн дарга Б.Булган, ХУД-ийн 8-р хорооны Засаг дарга Ё.Цацралтуяа, 52-р сургуулийн захирал болон 52-р сургуулийн 9 дүгээр ангийн сурагчид оролцож тууз хайчлах ёслолын арга хэмжээ боллоо. Шинэ кабинеттай сурагчид нээлттэй хичээл хийж юу сурч мэдсэнээ ирсэн зочдод сонирхууллаа. ХУД-ийн Засаг дарга Ж.Ганхуяг сурагчидтай ярилцаж, туршилтаа хэрхэн амжилттай хийж байгааг нь сонирхон сурагчдад сурлагын өндөр амжилт хүсэн ерөөлөө.

52-р сургуулийн “Физик”-ийн кабинет орчин үеийн сургалтын тоног төхөөрөмжтэй болсноор сургалтын орчинд тавигдах шаардлага хангагдаж суралцагчид сурч, хөгжихөд таатай боломж нээгдэж байна.

Физикийн хичээлээр динамик, статик, энерги, механик хөдөлгөөн, хэлбэлзэл долгион, цахилгаан статик, соронзон орон, оптик, дулаан дамжуулалт гэсэн агуулгаар 6-12 ангийн сурагчид туршилт хичээл явуулах боломжтой боллоо.

Физикийн кабинетийн зориулалтын үндсэн тоног төхөөрөмж найман төрөл нийт 19.730.0 үнэтэй, дагалдах тоног төхөөрөмж 83 төрөл 10.195.0 үнэ бүхий юм байна.