Амралтын өдрүүдээр гарц гарамгүй хэсгээр зам гарч яваад зургаан хүн автомашинд мөргүүлжээ

Өнгөрсөн амралтын өдрүүдэд нийслэлийн хэмжээнд явган зорчигч автомашинд мөргүүлсэн 6 осол бүртгэгдэж, 8 хүн гэмтэж бэртсэний 6 нь гарц гарамгүй хэсгээр зам гарч байсан байна. Мөн согтууруулах ундааны төрлийн зүйл хэрэглэсэн үедээ хөдөлгөөнд оролцож зам тээврийн осол гаргаж гэмтэж бэртсэн 5 осол бүртгэгдсэний 3 нь явган зорчигч аж.

Ташрамд дуулгахад, Тээврийн цагдаагийн албанаас “Зөвийг хэвшүүлье” уриалгын хүрээнд явган зорчигчийг зам тээврийн осол хэрэгт өртөхөөс урьдчилан сэргийлэх зорилгоор “Гэрлээр анхааруулъя” арга хэмжээ зохион байгуулж байгаа юм.

“Гэрлээр анхааруулъя” арга хэмжээний гол зорилго нь явган зорчигчийг зам тээврийн осолд өртөхөөс урьдчилан сэргийлэх, зам тээврийн гэмт хэргийг бууруулах аж.