Антониу Гуттериш: Бенжамин Нетаньяхугийн мэдэгдэлд маш их санаа зовж байна

Израилийн Ерөнхий сайд Бенжамин Нетаньяхугийн Иордан голын Баруун эргийн хэсгийг эзэлж авах тухай сонгуулийн сурталчилгааны мэдэгдэлд НҮБ-ын Ерөнхий нарийн бичгийн дарга Антониу Гуттериш маш их санаа зовж байгаагаа илэрхийллээ.

“Израилийн Ерөнхий сайд Нетаньяху сонгуульд ялсан тохиолдолд Баруун эргийн бүх газар нутагт Израилийн тусгаар тогтнолыг тогтоохын тулд Иорданы хөндий болон Сөнөсөн тэнгисийн хойд хэсгийг нэгтгэнэ гэж мэдэгдсэнд Ерөнхий нарийн бичгийн дарга санаа зовниж байна” гэж НҮБ-ын тэргүүний лхагва гарагт гаргасан мэдэгдэлд дурджээ.

Антониу Гутерришийн хэлснээр энэ нь олон улсын эрх зүйг зөрчсөн, цаашид Ойрхи Дорнодын асуудлыг шийдвэрлэх боломж, хэлэлцээрийг үгүй хийсэн үйлдэл гэнэ.

Бенжамин Нетаньяху энэ сарын 17-нд болох парламентын сонгуульд ялалт байгуулсан тохиолдолд Иорданы хөндий болон Сөнөсөн тэнгисийн хойд хязгаар орчмын хэсэгт Израилийн тусгаар тогтнолыг зарлана гэж мягмар гарагт амласан билээ.

2016 оны 12 дугаар сард баталсан НҮБ-ын Аюулгүйн зөвлөлийн 2334 дүгээр тогтоолоор Израиль улсыг Иордан голын Баруун эрэгт хүн ам суурьшуулах ажиллагаагаа зогсоохыг шаарддаг. Харин Израиль улс энэ тогтоолыг биелүүлэхээс татгалзсаар иржээ.