АНУ, Иран цөмийн хэлэлцээрийн асуудлаар шууд бус яриа хэлэлцээгээ сэргээв

Тегераны цөмийн хөтөлбөрийг хязгаарлах тухайд тохиролцохоор АНУ, Иран хоёр шууд бус яриа хэлэлцээгээ сэргээжээ. Европын холбоо энэ хэлэлцээнд зуучлагчаар оролцож байна.

Ираны ГХЯ-ны мэдээлснээр тус яамны дэд сайд Али Багери Кани мягмар гарагт Европын холбооны төлөөлөгчтэй Катарт уулзсан байна. Хэлэлцээ өнгөрсөн оны дөрөвдүгээр сард эхэлсэн, тохиролцоонд хүрэхэд тун ойрхон байна гэж байсан боловч Орос-Украины нөхцөл байдалтай холбоотойгоор 3 дугаар сард хэсэгчлэн түр зогсоосон юм.

Иран болон дэлхийн гүрнүүдийн хооронд 2015 онд байгуулсан хэлэлцээр Тегераны цөмийн үйл ажиллагааг хязгаарлах зорилготой байсан. Гэвч АНУ-ын тухайн үеийн Ерөнхийлөгч Дональд Трампын шийдвэрээр 2018 онд Вашингтон Ираны эсрэг хориг арга хэмжээгээ сэргээсэн юм. Тэр цагаас Иран цөмийн бүтээн байгуулалтаа эрчимжүүлсээр иржээ.