АНУ коронавирусний вакцин зайлшгүй хийлгэсэн байх шаардлагаа энэ сарын 12-ноос цуцална

АНУ-ын засаг захиргаа тус улсад ирж буй гадаадын иргэдээс коронавирусний вакцин зайлшгүй хийлгэсэн байх шаардлагаа энэ сарын 12-ноос цуцлахаар болжээ.

“Тавдугаар сарын 11-нээс хойш холбооны байгууллагуудын ажилтнууд, холбооны гэрээт ажилчид болон олон улсын агаарын рейсээр ирж буй зорчигчид "Ковид-19"-ийн эсрэг заавал вакцин хийлгэсэн байх ёстой гэсэн шаардлагаа цуцална” гэж Цагаан ордны мэдэгдэлд тэмдэглэжээ.

АНУ 2021 оны 11 дүгээр сараас эхлэн "Ковид-19"-ийн тарилгад бүрэн хамрагдсан гэсэн гэрчилгээг тус улсад ирсэн гадаадын иргэдээс шаардаж ирсэн юм. Ингэхдээ зөвхөн АНУ-ын эм бэлдмэлийн зохицуулах газар, ДЭМБ-аас сайшаасан вакцин хийлгэсэн байх ёстой гэж байжээ.

АНУ-ын Ерөнхийлөгч Жо Байден "Ковид-19"-ийн улмаас улс орондоо авсан онц байдлын дэглэмээ дөрөвдүгээр сард цуцалсан юм.