Азийн шатрын холбооны ерөнхийлөгч Монголын оюутны эмэгтэй багт баяр хүргэлээ

Азийн шатрын холбооны ерөнхийлөгч Шейх Султан бин Халифа Аль Нахъяан Монголын шатрын холбооны ерөнхийлөгч Я.Санжмятавт захидал ирүүлжээ. Тэрбээр уг захидалдаа Азийн оюутны спортын холбоо болон Азийн шатрын холбооноос 2020 оны арванхоёрдугаар сарын 14-29-нд www.chess.com сайтад зохион байгуулсан Оюутны Ази тивийн аварга шалгаруулах онлайн тэмцээний эмэгтэй ангилалд Монгол Улсын баг тамирчдын байгуулсан ялалт, тэмцээнийг амжилттай зохион байгуулахад хувь нэмэр оруулсан Монголын шатрын холбооны оролцоог өндрөөр үнэлж баяр хүргэхийн ялдамд шинэ жилийн мэнд дэвшүүлжээ.

Эргэн сануулахад, дээрх тэмцээнд ДШХМ Э.Хулан Оюутны Ази тивийн аварга болж, ДШХМ Э.Энхнар гутгаар байранд орж, Монголын эмэгтэй оюутан шатарчид багаараа тэргүүн байр эзэлсэн билээ.