Бага зэргийн хүчирхийлэл агуулсан цахим тоглоомыг 6-гаас дээш насны хүүхдүүдэд зөвшөөрдөг

Цахим тоглоомонд насны ангилал байдгийг эцэг, эхчүүд тэр бүр мэддэггүй. Тоглоомыг үйлдвэрлэгчид гаргахдаа ямар насныханд тохирсон, ямар насныханд тохирохгүй талаар дэлхийн хэд хэдэн байгууллагаас үнэлгээ авдаг. Энэ төрлийн үнэлгээ аваагүй тохиолдолд тухайн улсын бүр цаашлаад олон улсын зах зээл дээр тоглоомоо гаргах боломжгүй болдог. Үнэлгээг тоглоомын хайрцагны нүүрэн талд, дискэн дээр хүний нүдэнд шууд тусах газар тусгай тэмдэглэгээгээр тавьдаг. Дэлхий дээр хүлээн зөвшөөрөгдсөн хэд хэдэн насны ангилал тогтоогч байгууллага байдаг бөгөөд тэдгээрээс хамгийн том нь ESRB болон PEGI нар юм. Эдгээр байгууллага нь бусдаас хараат бус байдлаар үйл ажиллагаагаа явуулдаг. ESRB нь Entertainment Software Rating Board гэсэн үгийн товчлол бөгөөд Канад болон АНУ-д гаргасан тоглоомуудад хяналт тавьдаг байгууллага юм. Тоглоомын зах зээлийн хамгийн том худалдан авагч буюу үйлчлүүлэгчид нь АНУ-д байдаг тул энэ байгууллагаас үнэлгээ авалгүйгээр худалдаанд гарсан тоглоом бараг байхгүй гэж хэлж болно. Иймд одоо ашиглаж буй компьютер тоглоомын төрөл ангиллыг бид энэ байгууллагын ангиллаас харж болно. Тоглоомын насны ангиллын талаарх дэлгэрэнгүй мэдээллийг тус байгууллагын http://www.esrb.org/ веб сайтаас авна уу.

Бага насныханд. Энэ ангилалд 3-10 насны хүүхдүүд хамаарах бөгөөд 1994 оноос эхлэн мөрдөж эхэлсэн байна. 3-аас доош насны ангилалд багтсан тоглоомонд Сургалтын гэсэн үнэлгээ өгдөг бөгөөд тийм үнэлгээ авсан тоглоомонд тусгай тэмдэглэгээ хэрэгцээгүй байдаг байна. Энэ төрлийн тоглоомууд нь ойлгомжтой өнгө дүрс нь хүүхдэд зориулагдсан байдаг бөгөөд тоглох хэлбэр нь ч мөн адил энгийн бяцхан хүүхдэд зориулагдсан байдаг. Мөн ямар нэг хүчирхийлэл, согтууруулах ундаа, мансууруулах эм бэлдмэл гэх мэт зүйлсийг огт агуулааагүй байдаг байна.

Бүх насныханд. Энэ ангилал нь бараг хамгийн түгээмэл байдаг бөгөөд 6-гаас дээш бүх насныханд тохиромжтой гэсэн утга агуулдаг. Энэ ангилалд багтсан тоглоомууд дээрхийн адил ямар нэг хүчирхийлэл, ёс бус зүйл огт агуулдаггүй. Гэхдээ хүүхэлдэйн баатрууд, уран зөгнөл, маш бага хэмжээний хүчирхийлэл агуулдаг. Бага хэмжээний хүчирхийлэл гэдэг нь тоглоомын баатрууд эсрэг талынхнаа цохих, дээр нь гарах гэх мэт. Энэ ангиллыг 1998 оноос мөрдөж эхэлжээ.

10-аас дээш насныханд зориулсан.Энэ ангилал нь 10-аас дээш насныханд буюу арай учир ойлгодог болсон хүүхдэд зориулсан юм. Энэ ангиллын тоглоомууд бага хэмжээний хүчирхийлэл, уран зөгнөл, хиймэл цусны зураглал, ёс бус үг хэллэг зэргийг агуулдаг. Гэхдээ хүүхэд 10-аас дээш насных бол ямар нэг хортой, эсвэл буруу зуршил өгөх зүйл байхгүй гэж үздэг. Энэ ангиллыг 2005 оноос эхлэн хэрэгжүүлсэн.

Өсвөр насныханд зориулсан ангилал буюу 13 болон түүнээс дээш насныханд зориулсан тоглоомыг илтгэнэ. Энэ төрлийн тоглоом нь дунд зэргийн хүчирхийлэл, бохир хошигнол, цус, хийсвэр мөрийтэй тоглоом, бага зэрэг ёс бус үг хэллэг агуулдаг. Гэхдээ энэ нь тийм их санаа зовохоор хэмжээнд биш бөгөөд 13 насны хүүхдүүд тоглоом гэдгийг ойлгохуйц болсон байдаг тул хор нөлөө үзүүлэх нь бага гэж үздэг.

17 болон түүнээс дээш насныханд зориулагдсан тоглоом. Энэ ангилалд ёс бус үг хэллэг, согтууруулах ундаа зэрэг зүйлс агуулсан тоглоомууд багтана. Хэрвээ энэ төрлийн тоглоомыг 17-оос доош насны хүүхэд тоглохыг хүсвэл та хажууд нь байж хүүхдэд тоглоом гэдгийг ойлгуулж эдгээр зүйлсийн талаар зөв ойлголт өгөх хэрэгтэй. Харин эцэг, эхийн зөвшөөрөл хараа хяналтгүйгээр энэ ангиллын тоглоомыг 17-гоос доош насныханд тоглуулахгүй байх нь зөв юм.

Зөвхөн насанд хүрэгчдэд зориулсан. Ийм төрлийн тоглоомуудыг дэлгүүрүүд хүүхдэд худалдаалах ёсгүй бөгөөд архи, тамхины адилаар зөвхөн насанд хүрэгчдэд л худалдаалах боломжтой. Энэ төрлийн тоглоомууд нь хүчирхийлэл, секс, ёс бус үг хэллэгийг дээд хэмжээнд агуулах бөгөөд энэ ангилалд 2010 он хүртэл ердөө 25 тоглоом л багтсан байдаг.

Эх сурвалж: Cybersafety.mn