Бичил биетийг харахын тулд 1000 дахин томруулах хэрэгтэй

Ургамлын аймагт үлэмж биетүүдээс гадна үл үзэгдэх өчүүхэн ургамал ч бий. Гэхдээ та тэднийг үзэхийн тулд хол явах хэрэггүй. Тэд бидний эргэн тойронд хаа сайгүй л байдаг. Гол нь, тэднийг олж үзэх тийм ч хялбар биш. Үүний тулд сайн микроскоптой, түүнийгээ ажиллуулж чаддаг байх хэрэгтэй.

Өчүүхэн ургамлын хамгийн эгэл бичил биетүүд нь биеийн бүтэц, амьдрах аргаараа маш энгийн учраас амьтан, ургамлын хоорондын ялгаа мэдэгддэггүй. Хамгийн түгээмэл холер, сүрьеэ, сахуу зэрэг янз бүрийн хижиг өвчин өдөөгч бичил амьд биетүүд нь доорд ургамлын бактерийн ангид хамаардаг.

Та ямар бактери хамгийн жижиг вэ гэж асуух хэрэггүй. Бүр хэмжих боломжгүй тийм өчүүхэн ч бий. Хамгийн боловсронгуй микроскоп, хэт нарийн микроскопоор харахад ч үл өртөх биетүүд бий.
Тухайлбал, хамгийн жижиг бактерийн нэг болох бактери инфлуэнцийн голч ойролцоогоор микроны /микрон бол мм-ийг мянга хуваасны нэг/ хагастай тэнцэнэ. Түүнийг нүдэнд үзэгдэх цэгээр дүрслэн зуръя гэвэл 1000 дахин томруулах хэрэгтэй аж. Өөрөөр хэлбэл, ингэж томруулахад бидний чигчий хуруу 15 давхар байшингийн өндөртэй тэнцэхүйц 60-70 метр урт болох жишээтэй.
Үлэмж биетүүдийг дүрслэн зурахад тэднийг 1000 дахин багасгаж байсан. Харин өчүүхэн биетийг зурахад 1000 дахин томруулж байна. Ингэхээр өчүүхэн болон үлэмж биетний биеийн харьцаа 300 саятай тэнцэх нь.