Д.Гантулгад нээлттэй хорих ангид хоёр жил хорих ял оногдуулав

Нийслэлийн прокурорын газраас УИХ-ын гишүүн асан Д.Гантулгад яллах дүгнэлт үйлдэж ирүүлсэн хэргийн шүүх хуралдаан өчигдөр боллоо. Ийн Д.Гантулгыг хохирогчийн хүсэл зоригийн эсрэг хүч хэрэглэн бэлгийн харьцаанд орсон, мөн хохирогчийн хүсэл зоригийн эсрэг хүч хэрэглэн бэлгийн харьцаанд орохыг завдсан гэмт хэргийг үйлдсэн гэм буруутай болохыг тус тус тогтоож, эхний хэрэгт нэг жил дөрвөн сар, дараагийн хэрэгт найман сарын хугацаагаар хорих ялаар шийтгэв.

Түүнчлэн Д.Гантулгад оногдуулсан хоёр жилийн хугацаагаар хорих ялыг нээлттэй хорих байгууллагад эдлүүлэхээр тогтоосон байна.

Хэргийг эргэн сануулахад, Д.Гантулга өмнө нь иргэн Ч.Н гэх эмэгтэйг хүчирхийлсэн гэх хэрэгт холбогдон шалгагдсаны улмаас УИХ-ын гишүүнээс өөрийн хүсэлтээр чөлөөлөгдсөн. Хэрэг 2017 оны зургаадугаар сарын 12-нд үйлдэгдсэн байдаг. Үүнээс хойш жил гаруй хугацаанд шалгагдаад 2018 оны есдүгээр сарын 12-нд шүүх хурал болсон.

Шүүх хурлаар зайлшгүй шалгах ёстой зарим зүйлийг шалгаагүй байна гэх үндэслэлээр хэргийг буцаасан. Мөн мөрдөн шалгах ажиллагаа үргэлжилж байх явцад энэ оны нэгдүгээр сард Хан-Уул дүүргийн цагдаагийн хэлтэст УИХ-ын гишүүн асан Д.Гантулгын нэр дээр дахин гомдол ирсэн. Нийслэлийн прокурорын газраас гомдлыг хянаад гэмт хэрэг үйлдсэн гэж үзэх үндэслэл байгаа учир яллагдагчаар татсан байдаг.