“Дархан Минж”-ийн уулзварыг түр хаахаар боллоо

ХӨСҮТ-ийн баруун урд талын буюу “Дархан Минж”-ийн уулзварын өргөтгөл шинэчлэлийн ажил дуусах шатандаа орж, асфальтбетон хучилтын ажил эхэлж байгаа тул тус уулзварыг өнөө оройны 20:00 цагаас энэ сарын 15-ны 06:00 цаг хүртэл хаахаар боллоо.

Энэхүү уулзвар нь хотын хамгийн том худалдааны төв рүү чиглэсэн гол зам дагуу байдаг учир хөдөлгөөний ачаалал их авч, байнга түгжрэл үүсдэг замын тоонд багтдаг байсан. Удахгүй есдүгээр сарын 1-н болж, хичээл сургууль эхлэх учраас тухайн замын ачаалал урьдынхаас бүр илүү нэмэгдэнэ. Тиймээс их ачаалал эхлэхээс өмнө буюу энэ долоо хоногтоо багтаан замын хучилтын ажлыг дуусгахаар ийнхүү дээрх уулзварын бүх чиглэлийн хөдөлгөөнийг түр хугацаанд хааж байгаа юм. Уулзварын шинэчлэлийн ажлыг энэ сарын 16-ны баасан гарагт дуусгахаар төлөвлөж байна.

Тус уулзвараас гадна “Гудамж” төслийн хүрээнд өнөөдрийн байдлаар долоон уулзварын ажил ид өрнөж байна. Тухайлбал: Тасганы овооны уулзвар, Бөхийн өргөөний уулзвар, X хорооллын уулзвар, Ажилчны гудамжны уулзварын өргөтгөл шинэчлэлийн ажлууд ойрын хугацаанд ашиглалтад орохоор уртасгасан цагаар ажиллаж байна.