Евро стандартын хүлэмжийн төслийг хэрэгжүүлнэ

ХХАА-н сайд Р.Бурмаа Бүгд Найрамдах Болгар улсад албан ёсны айлчлал хийж байна. Энэ үеэр тэрбээр Болгар улсын Хөдөө аж ахуйн дэд сайд Васил Грудевтэй уулзаж, Монгол Улсын нийслэл Улаанбаатар хотод баригдах хүлэмжийн төслийн талаар санал солилцлоо.

Энэ хүлэмж нь Евро стандартад нийцсэн халаалт, гэрэлтүүлэг, агааржуулалт, услалтын автомат хяналтын системтэй баригдах бөгөөд Монголын цаг агаарт тохирсон нарийн ногоог тариалах боломжийг нээж өгч байгаа юм. Дэд сайд Васил Грудев “Хүлэмж барихад Болгарын талын техникийн шаардлага үзүүлэлтүүд хангагдсан, өөрсдийн хууль дүрмийн дагуу ажлыг эхлүүлэхэд бэлэн байгаагаа илэрхийлсэн байна. Мөн энэхүү төслийг хэрэгжүүлэхэд хоёр орны мэргэжилтнүүдийн мэдлэг туршлагад үндэслэн, хоёр талаас хүчин зүтгэл гарган хамтран ажиллах нь зүйтэй” гэдгийг онцолсон юм.

ХХАА-н сайд Р.Бурмаа Хөдөө аж ахуйн салбар дахь Болгарын мэргэжилтнүүдийн мэдлэг туршлагад сэтгэл хангалуун байгаагаа илэрхийлээд, энэхүү төслийг амжилттай хэрэгжүүлэхэд анхаарал тавин хамтран ажиллахаа мэдэгдлээ. Үүнээс гадна уулзалтын үеэр хоёр орны төлөөлөгчид жимс, хүнсний ногооны тариалалтад дэмжлэг авах, үрийн шинэчлэл хийх болон лизингийн үйлчилгээнд хамтарч ажиллах, хөдөө аж ахуйн чиглэлээр оюутнуудыг Болгарт сургах, богино болон урт хугацааны сургалтуудыг явуулах, бизнесийн байгууллагуудын танилцах уулзалт зохион байгуулах зэрэг асуудлуудаар санал солилцсон юм.

Эх сурвалж: Хүнс, хөдөө аж ахуйн яам