“Фауст” энэ сарын 6-8-нд үзэгчдэд хүрнэ

Найруулагч М.Батболд “Альфа” постдрамын театр байгуулж, театрынхаа хөшгийг Германы суут зохиолч, эрдэмтэн И.В.Гётегийн “Фауст” жүжгээр нээхээр болсон талаар бид өмнө нь мэдээлсэн. Ардын жүжигчин Мягмарнарангийн хүү, ОХУ-ын Москвагийн театр урлагийн академи (ГИТИС)-ийн төгсөгч М.Батболдын найруулсан И.В.Гётегийн хоёр бүлэг, 14 үзэгдэлт “Фауст” постдрам энэ сарын 6, 7, 8-нд 19:00 цагт Корпорейт конвеншн центрт тоглогдоно.

Дэлхийн сонгодог жүжгийн ноён оргил, тулгын гурван чулуугаар У.Шекспирийн “Гамлет”, М.Сервантисын “Кихот ноён”, И.В.Гётегийн “Фауст”-ыг нэрлэдэг бөгөөд “Фауст” жүжгийн гол дүрд Ардын жүжигчин Г.Мягмарнаран, Гавьяат жүжигчин Б.Жаргалсайхан, соёлын тэргүүний ажилтан С.Болд-Эрдэнэ, Т.Бархүү нараас гадна залуу жүжигчин М.Лхагва, Б.Одгэрэл, Т.Анхзул, Б.Хатанбаатар нар тоглоно.