Гадаад паспортын захиалгыг үйлчилгээний төвүүдэд авч байна

Мэргэжлийн Засгийн газрын үйл ажиллагааны эхний 100 хоног энэ өдрүүдэд тохиож байна. Тэгвэл өнөөдөр Оюуны өмч, Улсын бүртгэлийн ерөнхий газраас энэ 100 хоногт хийсэн ажлынхаа талаар мэдээлэл хийлээ.

Энэ үеэр гадаад паспортын захиалгыг дүүргүүд дээр авдаг болж буй талаар мэдээлсэн юм. Тодруулбал, "Мишээл" экспо төв, "Драгон" үйлчилгэний төв болон "Дүнжингарав" худалдааны төв дэх "Нэг цэгийн үйлчилгээний төв"-үүдэд гадаад паспортын захиалгыг авах ажээ.

Уг үйлчилгээ нь иргэдийн цаг завыг хэмнэх, төрийн үйлчилгээг иргэдэд түргэн шуурхай хүргэх олон давуу талтай. Тодруулбал, гадаад паспорт шинээр захиалах иргэдээс цээж зураг зайлшгүй шаарддаг байсан бол Дүнжингарав, Драгон, Мишээлд төвөөр үйлчлүүлэх иргэдээс гадаад паспортын зураг шаардахгүй бөгөөд бүртгэлийн ажилтан тухайн иргэний зургийг бүртгэл хийх үедээ авах юм.

Бэлэн болсон гадаад паспортын буцаан олголтыг иргэн өөрийн хүсэлтээр Монгол шуудан компаниар дамжуулан гэрийн болон ажлын хаягаараа авах боломжтойгоос гадна захиалсан газраасаа заасан хугацаанд авч болно.

Харин гадаад паспортын хугацааны сунгалтыг хийхгүй бөгөөд тус газрын Зуун айлд байрлах Гадаад паспортын хэлтэст хандаж сунгуулна.

Бүрдүүлэх материал:

1. Анх удаа авч байгаа бол:

• иргэний үнэмлэх

• төлбөр төлсөн баримт

2. Хүчинтэй байдал нь алдагдсан болон хугацаа нь дуусч дахин авах бол:

• хуучин гадаад паспорт

• иргэний үнэмлэх

• төлбөр төлсөн баримт

Жич: Эзэн өөрийн биеэр ирж хурууны хээгээ уншуулж таниулах ёстойг анхаарна уу.