Гэр, байшин шатаж буй дуудлага иржээ

Өчигдөр Нийслэлийн Чингэлтэй дүүрэгт айлын гэр болон байшин шатаж байна гэсэн хоёр дуудлагын дагуу Онцгой байдлын алба хаагчид ажиллажээ. Чингэлтэй дүүргийн 19 дүгээр хороо, Тахилтын 2 дугаар гудамжийн 163 тоотод иргэн Б-н гэр шатаж байна гэсэн дуудлагын дагуу Сүхбаатар дүүргийн Онцгой байдлын хэлтсийн Гал түймэр унтраах, аврах 34 дүгээр ангийн 8 албан хаагч очиж ажилласан бол мөн Чингэлтэй дүүргийн 8 дугаар хороо, Баруун тасган нэг дүгээр гудамжийн 8 тоотод иргэн Б-н байшин шатаж байна гэсэн дуудлагыг 2016.12.03-ны өдрийн 13:41 цагт хүлээн авч тус дүүргийн Онцгой байдлын хэлтсийн Гал түймэр унтраах, аврах 10 дугаар ангийн 8 албан хаагч очиж галыг аюулгүй болгожээ.

Мөн хөдөө орон нутгийн онцгой байдлын алба хаагчид галын хоёр дуудлагад ажилласан байна. 12 дугаар сарын гуравны өдрийн 14:02 цагт Сэлэнгэ аймгийн Сүхбаатар сумын 6 дугаар багийн 2 дугаар гудамжийн 187 тоотод иргэн О-н “Хутагт эх хийд” шатаж байна гэсэн дуудлагаар аймгийн Онцгой байдлын газрын Гал унтраах, аврах 36 дугаар ангийн 8 албан хаагч, 2 автомашинтай тус тус ажилласан байна.

Харин өнөө өглөө 07:00 цагт Хөвсгөл аймгийн Мөрөн сумын Сүх багийн 31 дүгээр гудамжийн 10 А тоотод иргэн Е-н байшин шатаж байна гэсэн дуудлагаар тус аймгийн Онцгой байдлын газрын Гал түймэр унтраах, аврах 27 дугаар ангийн 8 албан хаагч ажиллаж аюулгүй болгожээ. Уг гал түймэрт иргэн Е /25 настай, эрэгтэй/ түлэгдсэнийг Нэгдсэн эмнэлгийн яаралтай тусламжийн тасагт хүлээлгэн өгсөн байна.

Д.Нарантуяа