Голууд үертэй байна

Долоодугаар сарын 26-ны өдрийн байдлаар Хэнтий нуруунаас усжих Туул/Босгын гүүр/, Хэрлэн/Хонгон, Багануур/, Онон/Биндэр/, Эг/Батширээт/, Хангай нуруунаас эхтэй Байдраг/Баянбүрд/ голуудын усны түвшин өмнөх өдрөөс 10-15 см тус тус нэмэгдсэн байна.

Мөн Орхон /Өлзийт/ Байдраг /Баянбүрд/ голууд үерийн түвшинг 10 см-ээр даван үерлэж байна.

Долоодугаар сарын 27-нд төв болон зүүн аймгуудын нутгийн зарим газар, говийн аймгуудын нутгийн зүүн хэсгээр усархаг бороо, дуу цахилгаантай аадар бороо орох тул хур борооны эрчимшил хэмжээнээс шалтгаалан гол мөрний усны түвшин богино хугацаанд огцом нэмэгдэх, сайр, гуу жалгаар уруйн үер буух нөхцөл бүрдэж болзошгүй тул иргэд үерийн аюултай бүсээс хол газар зусах, амрах мөн гол мөрөн, нуурын ойролцоо амарч зугаалахдаа ажиглалт хийж, уулын ам, голын эрэг хөвөөнөөс зайдуу, үерийн буулт бүхий газарт отоглож хоноглохгүй байх, зөвхөн зөвшөөрөгдсөн зам, гүүрээр зорчихыг зөвлөж байна.