Иран улс Эхийн өдрийг угтан 975 эмэгтэйг хугацаанаас нь өмнө суллана

Иран улс ирэх баасан гарагт тэмдэглэх Эхийн өдрийг угтан 975 эмэгтэйг хугацаанаас нь өмнө хорихоос суллахаар болжээ.

Суллагдах эмэгтэйчүүдийн тоонд эсэргүүцлийн хөдөлгөөнд оролцогчид ч багтсан байна.

“Хугацаанаасаа өмнө суллагдсан хүмүүс цаашид болгоомжтой байж, дахин буруу замаар орохгүй байхыг зөвлөж байна. Үүнийг зөрчвөл илүү хатуу хариуцлага хүлээлгэх болно” гэж Ираны Дээд шүүхийн төлөөлөгч Голям Хосейн Мохсени-Эжеи мэдэгджээ.

Зөнч Мухаммедын охин Фатимагийн төрсөн өдрөөр болдог Эхийн өдрийг угтан энэ сарын 9-нөөс хойш нийт 4000-гаад хүн суллагдсан гэж хэвлэлүүдэд бичиж байна.

Ираны Ерөнхийлөгч Эбрахим Раиси өнгөрсөн сарын сүүлчээр АНУ, өрнөдийн орнуудыг Иранд бослого үймээн дэгдээсэн гэж буруутгаад, хууртагдсан хүмүүсийг өршөөж, урвасныг нь хатуу шийтгэнэ гэдгээ зарласан юм.