Ирэх сарын 1-нээс өмнө 8 замыг нээнэ

Наймдугаар сарын 31-нээс өмнө дараах 8 замын зорчих хэсгийг бүрэн нээж, тээврийн хэрэгслийн хөдөлгөөнийг хэвийн явуулахаар төлөвлөн ажиллаж байгаа гэдгийг Нийслэлийн автозамын газраас мэдээллээ.Эдгээр замд:

1. Дунд гол, Үйлдвэрийн гудамж, 19-р хорооллын араар явах 4.1 км авто зам;

2. Нарны замын баруун хэсэг, Вокзалаас 10-р хорооллын уулзвар хүрэх 1 км авто зам;

3. Зүүн 4 замаас Амгалангийн тролейбусны эцэс хүртэл 4.5 км авто зам;

4. Доржийн гудамж, Туул Жин Пангийн уулзвараас зүүн тийш Цайз зах хүртэл 2.8 км зам;

5. Сөүлийн гудамж, Гранд Плазагийн уулзвар;

6. БЗД, 26-р хороо, Баянмонгол хорооллыг Нарны замтай холбох 0.2 км авто зам, автомашины нүхэн гарц;

7. БГД, 8-р хороо, Ард Аюушийн гудамжийг Жамсранжавын гудамжтай холбох 0.5 км зам;

8. ЧД, Хүчит шонхор захаас Хувьсгалчдын гудамж хүртэлх 1.7 км авто зам /Далан давхраас баруун тийш/.

Дээрхээс гадна 11 зам дээр ажил явагдаж байгаа бөгөөд эдгээрээс дараах 2 замыг 2014 онд хүлээж авах ажээ. Үүнд:

1. Баянзүрхийн товчооноос Богд уулын араар Яармагийн гүүр хүртэлх 17.1 км авто зам,

2. Төмөр замын урдуурх хэвтээ тэнхлэгийн гол гудамж замын зүүн хэсгийн үргэлжлэл 6.0 км авто зам /Дүнжингарав худалдааны төвийн замаас Улиастайн замын уулзвар хүртэлх/.

Үлдсэн 9 зам барилгын ажлуудын төлөвлөгөөт графикийг шахан ажиллаж байгаа гэлээ. Үүнд:

1. СБД, 1-р хороо, Олимпийн гудамж, Гэндэнгийн уулзварыг шинэчилж 4 замын уулзвар болгож өргөтгөж, шинэчлэх3000 м.кв,

2. БГД, Шүүхийн гудамжнуудын 1.0 км авто замын шинэчлэлт,

3. СБД, Сэлхийн зуслангийн 4.5 км авто зам,

4. БЗД, 25-р хороо, “Зүүн Сэлбэ” орон сууцны хороолол доторх 0.6 км авто зам /Дамдинсүрэнгийн гудамжийг Нарны замтай холбох/,

5. Яармагийн гүүрнээс Нисэх - Нисэхийн товчоо, Сонсголонгийн уулзвараас Яармагийн товчоо хүртэлх 13.7 км авто замын өргөтгөл, шинэчлэлт,

6. СБД, Шарга морьт-Жигжидийн уулзвараас Гүнтийн даваа чиглэлийн 5 км авто зам,

7. Нисэхийн товчоо – Биокомбинат - Шувуун фабрик чиглэлийн 22.5 км авто замын өргөтгөл шинэчлэлт,

8. Бэлхийн шинээр баригдсан замын үргэлжлэл 0.7 км авто зам, нийт 5.7 км-т гэрэлтүүлэг хийх,

9. СХД, 3-р хороо, Буяны 2.0 км авто зам.

Өнөөдрийн байдлаар нийслэлийн хэмжээнд ажил нь хэрэгжиж дууссан 4 зам, зорчих хэсгээ бүрэн нээсэн 11 зам, 1 гүүр, гэрээ байгуулан ажил эхэлсэн 2 гүүр, ажил явагдаж байгаа 19 зам, гэрээ байгуулах шатанд 2 зам, 3 гүүрэн гарц, тендерийн үнэлгээний шатанд 1 зам байна.

Мөн Нийслэлийн замын сангийн ажил 50 хувь байгаа бол нийт ажлын явц 65 хувьтай байгаа ажээ.