Ирландын Ерөнхий сайд АНУ-д айлчилж байна

Ирландын Ерөнхий сайд Энда Кенни өчигдөр "Цагаан ордон"-д хүрэлцэн очиж АНУ-ын Ерөнхийлөгч Дональд Трампад бараалхсан байна. Тэрбээр энэхүү уулзалтынхаа үеэр АНУ-ын Ерөнхийлөгчийг Ирландад айлчлахыг урьжээ.

Мөн энэхүү уулзалтаар АНУ-ын шинэ Ерөнхийлөгчийн жинхэнэ дайн зарлаад байгаа хууль бус цагаачлалтай холбоотой асуудлыг хөндөж хэлэлцсэн байна. Ирландын Ерөнхий сайд АНУ-ын визний хугацаа нь хэтэрсэн Ирландчуудад хууль ёсны зөвшөөрөл олгох нөхцлийг бүрдүүлж өгөх хүсэлт тавьжээ.

Энда Кенни Ерөнхий сайдын мэдээлснээр бол АНУ-д Ирландын нийт 50 гаруй мянган иргэн хууль бусаар амьдарч буй юм байна. Ирландын Ерөнхий сайд Гэгээн Патрикийн өдөрт зориулсан арга хэмжээнд оролцохоор АНУ-д ийнхүү долоо дахь удаагаа айлчилж байгааг хэвлэлүүд энэ дашрамд мэдээлж байна.