Исламын сүм рүү дайрсан этгээдийг хэн болохыг тогтоожээ

Ням гарагийн шөнө бүхээгтэй авто машин Лондон хотын Финсбюри цэцэрлэгийн ойролцоо “Seven sisters” замын хажуугийн лалын сүмийн гадна цугласан олныг дайрсан тохиолдол гарч, хэргийн газарт цагдаагийнхан болон түргэн тусламжийнхан очиж яаралтай арга хэмжээ авсныг холбогдох албаныхан мэдээлж байсан.

Цагдаа нар орон нутгийн цагаар ням гарагийн шөнийн 00 цаг 20 минутад авто машин явган хүмүүсийг дайрсан тухай дуудлага хүлээн авч, шуурхай арга хэмжээ авчээ. Бүхээгтэй авто машиныг жолоодож явсан хүнийг цагдаа нар тэр дор нь баривчилсан бөгөөд түргэн тусламжийнхан яаралтай тусламж шаардлагатай хүмүүсийг эмнэлэгт хүргэсэн байна.

Тэгвэл өнөөдөр бүхээгтэй авто машины жолоочийг Даррен Осборн гэгч 47 настай эрэгтэй болохыг Их Британийн хэвлэл мэдээллийн хэрэгслүүд мэдээлжээ. Тэрбээр Уэльсийн нийслэл Кардифф хотын оршин суугч юм байна.

Дайралтын үеэр нэг хүн амиа алдаж, 10 хүн шархадсан. Сэжигтнийг хэргийн газар дээр баривчилсан бөгөөд террорист халдлага үйлдсэн гэж буруутгаж, саатуулаад байгааг цагдаагийн газар мэдэгджээ. Үүнтэй холбоотойгоор Их Британийн Ерөнхий сайд Тереза Мэй тус халдлагыг муслим шашинтнуудыг үзэн ядах сэдлээр үйлдсэн болохыг цохон тэмдэглээд энэ халдлага нь сүүлийн саруудад тохиосон террорист халдлагуудаас огтхон ч ялгаагүй жигшүүртэй хэрэг юм гэж мэдэгдсэн байна.