Израилийн ерөнхий сайд АНЭУ-д анхны албан ёсны айлчлал хийж байна

Израилийн ерөнхий сайд Нафтали Беннетт Арабын Нэгдсэн Эмират улсад албан ёсны айлчлал хийсэн анхны Ерөнхий сайд боллоо.

Тэрбээр даваа гарагт Абу Дабигийн угсаа залгамжлах хунтайж, Эмиратын захирагч шейх Мухаммад Ибн Заид Аль Нахайянтай хэлэлцээ хийсэн байна. Өнгөрсөн есдүгээр сард Израиль АНЭУ-тай харилцаагаа хэвийн болгосны дараа уг айлчлалыг АНУ зуучилсан юм. Израиль Палестины асуудлаар Арабын орнуудтай удаан хугацааны турш зөрчилдөөнтэй байсан.

Дараа нь Израилийн ерөнхий сайд Нафтали Беннетт мэдэгдэл гаргаж, уулзалтын үр дүнг онцолсон бөгөөд уулзалтын үеэр эдийн засгийн хамтын ажиллагаа, бүс нутгийн хэрэг зэрэг олон сэдвийг хэлэлцжээ.

Энэ нь Персийн булангийн орнууд Ирантай харилцаагаа сэргээх алхмуудыг судалж байгаа үед Израиль Эмираттай харилцаагаа бэхжүүлэх алхам хийж байгаагийн илрэл боллоо.

Энэхүү айлчлал нь Персийн булангийн чинээлэг улс Арабын олон арван жилийн зөвшилцөлийг эвдэж, Абрахамын хэлэлцээр гэж нэрлэгддэг АНУ-ын зуучлалын цуврал хэлэлцээрийн дагуу дипломат харилцаа тогтоосноос хойш жил гаруйн дараа болж байна. Израиль мөн Исламын бүгд найрамдах улсын цөмийн хөтөлбөрийн асуудлаар Ирантай олон улсын яриа хэлэлцээг дахин эхлүүлэхийн эсрэг дипломат арга хэмжээ авч байгаа.

Харилцан худалдааны хэмжээ хэдхэн сарын дотор өсч, "Ирээдүйд үүнийг хөгжүүлэх хязгааргүй боломжууд бий. Израиль бол АНЭУ-ын нэгэн адил бүс нутгийн худалдааны төв юм. Бидний хамтын ажиллагаа манайд төдийгүй олон оронд урьд өмнө байгаагүй эдийн засгийн боломжуудыг олгож байна" гэж Абу Дабигийн угсаа залгамжлах хунтайж Мухаммад ибн Заид Аль Нахайян мэдэгдсэн байна.