Ж.Батсуурь: Ажлын хэсэгтэй холбоотойгоор өнөөдөр Тавантолгойн асуудлыг хэлэлцээгүй

Тавантолгойн асуудлыг хэлэлцэх байсан Эдийн засгийн байнгын хорооны лхагва гарагийн хуралдаан хойшилсон. Харин хуралдааныг УИХ-ын дарга З.Энхболдын хүсэлтээр хойшлуулсан гэх мэдээлэл хэвлэл, мэдээллийн хэрэгслээр гарч буй.

Энэ талаар УИХ-ын гишүүн, Эдийн засгийн байнгын хорооны дарга Ж.Батсууриас тодруулахад, “Эдийн засгийн байнгын хорооны өнөөдрийн хуралдаанаар Тавантолгойн хөрөнгө оруулалтын гэрээтэй холбоотой УИХ-ын тогтоолын төслийг хэлэлцэх байсан ч хуралдааныг түр хойшлууллаа. Учир нь гэрээ, тогтоолын төсөлтэй холбогдуулж санал, дүгнэлт гаргах Ажлын хэсгийг өнөөдөр УИХ-аас байгуулсан. Намын бүлгүүд энэ асуудлыг хэлэлцэж, байр сууриа илэрхийлэх ёстой ч одоохондоо зарим намын бүлгийн шийдвэр гараагүй байна. Ажлын хэсгийн дүгнэлт гарсан тохиолдолд Эдийн засгийн байнгын хороо хэлэлцэх эсэхийг шийдвэрлэхэд бэлэн байна" гэсэн юм.