Казахстаны тамирчдаас хамгийн их найдлагатай нь Г.Отгонцэцэг

Олимпийн наадам ойртож буй энэ үед улс бүр “Рио-2016”-д хүч үзэх тамирчдаа тодруулсаар байна. Энэ удаа уншигч танд Казахстаны жүдочдоос хэн, хэн оролцох болсныг танилцуулъя.

Тус улсаас таван жүдоч татамид гарах бөгөөд эрэгтэйчүүдийн ангилалд -60 кг-д Елдос Сметов, -66 кг-д Жансай Смагулов, -100 кг-д Максим Раков, эмэгтэйчүүдийн ангилалд -48 кг-д Галбадрах Отгонцэцэг, -63 кг-д Мариан Урдабаева нар олимпийн эрх аваад байна. Олон улсын судалгаагаар дээрх тамирчдаас “Рио-2016” наадмын медаль хүртэх тамирчнаар Г.Отгонцэцэгийг онцолжээ. Тэрбээр Монгол Улсын жүдо бөхийн шигшээ багт харьяалагддаг байсан ч хоёр жилийн өмнө Казахстаны иргэн болсон билээ.