“Кемерова” мужийн тээвэрчдийн төлөөлөгчид Монголд айлчиллаа

Цахилгаан тээвэр ОНӨААТҮГ-т туршлага судлахаар ОХУ-ын “Кемерова” мужийн троллейбусны депогоос зочид төлөөлөгчид 2013 оны 08 дугаар сарын 16-наас 20-ний өдрийн хооронд айчлал хийв.

ОХУ-аас ирсэн цахилгаан тээвэрчдийг Монголын цахилгаан тээвэрчид өөрсдийн үйлдвэрлэсэн JEA-800D загварын монбусаар нисэх дээр тосон авсан нь мэргэжил нэгт орос инженерүүдийн хувьд сонирхолтой байлаа.

ОХУ-ын Кемерова мужийн Кемерова хотын цахилгаан тээврийн удирдах газрын дарга Шветцов Евгений Александрович болон Иркутск хотын “Транскомплекс” компанийн ерөнхий захирал Иванова Татьяна Игоревне тэргүүтэй 8 хүний бүрэлдэхүүнтэй инженер техникийн ажилтнууд Цахилгаан тээвэр ОНӨААТҮГ-ын үйл ажиллагаа болон JEA-800D загварын монбусны үйлдвэрлэлтэй танилцаж харилцан туршлага солилцов.

ОХУ-ын Кемерова мужийн Кемерова хотод 80 ширхэг трамбай, 90 ширхэг троллейбус 15 чиглэлд ажилдаг бөгөөд цаашид Кемерова хотын цахилгаан тээвэрчидтэй хамтран троллейбус, трамбайг ОХУ-д угсрах боломжийн талаар санал солилцлоо.
Мөн ОХУ-ын Иркутск хотын цахилгаан тээвэрчидтэй хамтран хувьсах гүйдлийн систем бүхий Монголын анхны JEA-800D загварын Монбусыг энэ оны 11 дүгээр сард үйлдвэрлэн Нийслэлийн иргэдийн үйлчилгээнд гаргахаар тохиролцов.