Хоккайдогийн Сувилахуйн их сургуулийн багш нар хичээл заалаа

Японы Хоккайдогийн Сувилахуйн их сургуулийн багш нар Сүхбаатар дүүргийн Эрүүл мэндийн төвийн сувилагч нарт хичээл заалаа. Японы Засгийн газрын “Өвсний үндэс” техникийн хамтын үйл ажиллагааны хөтөлбөрийн эрүүл мэндийн төсөл 2017 оноос Сүхбаатар дүүргийн эрүүл мэндийн төвд хэрэгжиж эхэлсэн.

Энэ хүрээнд тус дүүргийн болон Өрхийн эрүүл мэндийн төвийн эмч, сувилагч нарыг Япон улсын Хоккайдогийн Китами хотын сувилахуйн сургуульд “Улаанбаатар хотын гэр хорооллын иргэдийн эрүүл мэндийг хамгаалахад сувилахуйн мэргэжилтнийг бэлтгэх” сургалтанд хамруулж байгаа юм.

Тус төслийн хамт олон амьдралын буруу хэвшлээс үүдэлтэй өвчнөөс урьдчилан сэргийлэхэд сувилагч нарын зөвлөгөө өгөх ур чадварыг дээшлүүлэх зорилгоор дүүргийн болон өрхийн эрүүл мэндийн төвийн 20 сувилагчийг хамруулан тохиолдолд суурилсан хэлэлцүүлэг, дадлага сургалтыг энэ сарын 05-ны өдөр зохион байгууллаа.

Сургалтад Хоккайдогийн Сувилахуйн их сургуулийн Эрүүл мэнд, шинжлэх ухааны тэнхимийн доктор Ямамото Нориюүки “Дасгал хөдөлгөөнөөр амьдралын хэв маягтай холбоотой өвчнөөс урьдчилан сэргийлэх нь” сэдэвт лекц уншиж, бие махбодийн бүтэц ба үйл ажиллагаа болон биеийн бүтцийг хэмжих, атгах хүчийг хэмжих, үйл ажиллагааны хүрэх цэгийг хэмжих хэмжилт болон амьдралын хэв маягтай холбоотой өвчнөөс урьдчилан сэргийлэх дасгал хөдөлгөөнийг заалаа.