Хорь гаруй хүний аминд хүрсэн Тайланд цэргийг цагдаа нар буудан хороожээ

Хорь гаруй хүний аминд хүрч, 30 хүнийг шархдуулсан халдлага Тайланд улсын Накхон Ратчасима мужид болсон юм.Тайландын зүүн хойд зүгт байрлах энэ мужийн цэргийн бааз руу буутай этгээд бямба гарагт гал нээсэн байна. Үүний дараагаар халдлага үйлдэгч ойролцоох худалдааны төв рүү очиж, энгийн иргэд рүү гал нээж эхэлжээ. Уг халдлагыг үйлдэгч нь Тайландын армийн албан хаагч гэдгийг тогтоогоод байгаа юм. Цагдаа нар галт зэвсгээр өөрийгөө бүрэн тоноглосон этгээдийн халдлагыг зогсоох, баривчлах ажиллагааг эхэлснээс хойш 12 цагийн дараа мөрдөн хайх ажиллагаа зогссон байна. Цагдаагийн албаныхан халдлага үйлдэгчийг ням гарагийн өглөө орон нутгийн цагаар 09 цагт буудан хороосон талаар албан ёсоор мэдээлжээ.

Тайландын Батлан Хамгаалах Яамны хэвлэлийн төлөөлөгч энэхүү харуусалтай үйл явдалтай холбогдуулж хэлсэн үгэндээ, “ерөнхийдөө армийн албан хаагч бүр галт зэвсгийг чадмаг эзэмшсэн байдаг. Гэхдээ энэ халдлагыг үйлдсэн этгээд илүү чадварлаг нэгэн байлаа” гэж ярьсан байна. Тайланд цэрэг ямар зорилгоор ийнхүү иргэд болон армийн нөхөд рүүгээ халдсан нь одоогоор тогтоогдоогүй байгаа юм. Зарим хэвлэлүүд Тайланд цэрэг ахлахтайгаа маргалдсаны дараагаар энэхүү халдлагыг үйлджээ гэж бичжээ.