Хоёр жил сураад “Монгол дохионы хэлмэрч” мэргэжлийн V-VI түвшний үнэмлэхтэй төгсөнө

Хөгжлийн бэрхшээлтэй хүний хөгжлийн ерөнхий газраас тус газрын цахим хуудсанд иргэдээс ирсэн асуултуудад хариуллаа.

-Танай байгууллагаар дамжуулж ажилд орох боломжтой юу?

-ХБХХЕГ дээр бичиг баримттайгаа биечлэн ирж ажил хайгч иргэний бүртгэлийн ХЗЗ-2 маягтыг бөглөнө. Бид тохирсон ажилд зуучлах болно. Мөн дүүргүүдийн Хөдөлмөр, халамжийн үйлчилгээний газар, хэлтэс, хувийн биржүүдэд хандаарай.

-СЗСҮТ-ийн Мэргэжлийн боловсрол, ур чадвар олгох сургуулиас явуулах гэж буй дохионы хэлний хэлмэрчийн сургалтад ямар хүмүүс хамрагдах вэ?

-Сургалтад насны хязгаар заахгүй бөгөөд их дээд болон коллежийн дундаас дээш түвшний боловсролтой, хөгжлийн бэрхшээлгүй, бүрэн сонсголтой иргэд хамрагдана. 2022 оны нэгдүгээр сарын 07-ноос хоёрдугаар сарын 07-ны хооронд 80044033, 96676095, 77772001 дугаарууд руу холбогдож бүртгүүлнэ.

-Дохионы хэлний хэлмэрчийн сургалт хэдэн жилээр явагдах вэ?

-Сургалтын хугацаа хоёр жил, “Монгол дохионы хэлмэрч” гэсэн мэргэжлийн V-VI түвшний үнэмлэхтэй төгсөнө. Хөдөө орон нутгийн оюутнууд сургуулийн дотуур байранд байрлаж болно. Сургалтын төлбөр хагас жилийн 450,000 төгрөг.

-СЗСҮТ-ийн Сэргээн засах төвд шинээр нээгдэж байгаа шүдний кабинетэд цаг авч, үйлчлүүлж болох уу?

-Шүдний кабинетаар зөвхөн тус төвд хэвтэн эмчлүүлж байгаа шүдний эмчилгээ шаардлагатай иргэд үйлчлүүлнэ.