Хөвсгөл аймгийн Засаг дарга Л.Ганболдоор ахлуулсан ажлын хэсэг сумдад ажиллаж байна
“Эрх зүйн хөтөч” өдөрлөгт төрийн 13 байгууллага, төрийн бус 3 байгууллагын нийт 52 хүний бүрэлдэхүүнтэй баг аймгийн төвд үзүүлдэг төрийн 2 дахь шатлалын үйлчилгээг алслагдсан багийн иргэдэд хүргэж, иргэдийн өмнө тулгамдсан асуудлыг газар дээр нь шийдвэрлэн ажиллаж байна.
Мэдээллийн алба
Хөвсгөл аймгийн Засаг дарга Л.Ганболдоор ахлуулсан ажлын хэсэг өнөөдөр Алаг-Эрдэнэ суманд ажиллалаа. “Эрх зүйн хөтөч” өдөрлөгт төрийн 13 байгууллага, төрийн бус 3 байгууллагын нийт 52 хүний бүрэлдэхүүнтэй баг аймгийн төвд үзүүлдэг төрийн 2 дахь шатлалын үйлчилгээг алслагдсан багийн иргэдэд хүргэж, иргэдийн өмнө тулгамдсан асуудлыг газар дээр нь шийдвэрлэн ажиллаж байна.
Өнөөдөр Алаг-Эрдэнэ сумын хэмжээнд 900 гаруй иргэд төрийн үйлчилгээг авсан юм. Тухайлбал 204 иргэн зөвлөгөө мэдээлэл, хууль зүйн туслалцаа үйлчилгээг, 246 иргэн дотор, мэдрэл, хүүхэд, эхо, эмэгтэйчүүд зэрэг эмч нарын үзлэгт хамрагдаж эрүүл мэндийн үйлчилгээг, давхардсан тоогоор 2172 иргэнд хууль эрх зүйтэй холбоотой гарын авлага тарааж, 329 иргэнд сургалт мэдээлэл өгч ажиллалаа.
Алаг-Эрдэнэ сумын иргэдийн хувьд эрүүл мэндийн үйлчилгээ хамгийн их ачаалалтай байлаа. Цаашид олон төрлийн нарийн мэргэжлийн эмч нарын үзлэг хийлгэх хүсэлтэй байгаагаа хэлж байв.
Орон нутгийн иргэд малын хулгай болон зөрчлийн хуулийн талаар илүү их сонирхож мэдээлэл зөвлөгөөг авч байна. Мөн ерѳнхий боловсролын сургуулийн 8, 11 дүгээр ангийн сурагчдад замын хѳдѳлгѳѳний аюулгүй байдал, цахим ертѳнц, гэр бүлийн хүчирхийллээр сургалт зохион байгуулж иргэдээс ирүүлсэн санал хүсэлтэд хариулан "Дураараа биш дүрмээрээ" аяныг сурталчилж байна. Өдөрлөгийг аймгийн ЗДТГ-ын Хууль эрх зүйн хэлтэс, Цагдаагийн газар, Прокурорын газар, Шүүхийн эвлэрүүлэн зуучлагч, сэтгэл зүйч, аймгийн ГБХЗХГ, НДХ, ХХҮГ, БОАЖГ, ЭМГ, ГХБХБГ, ХЭҮК болон Дэлхийн зөн ОУБ хамтран зохион байгуулж байгаа ажээ.
Ийнхүү аймгийн Засаг даргын үйл ажиллагааны хөтөлбөрийн хэрэгжилтийг иргэдэд тайлагнах, иргэдийн санал хүсэлтийг хүлээн авч шийдвэрлэх, төрийн бодлогоо боловсруулахад иргэдийн оролцоог нэмэгдүүлж, төрөөс үзүүлж байгаа үйлчилгээг хүртээмжтэй чирэгдэлгүй нэг цэгээс иргэдэд хүргэх, өвөлжилтийн бэлтгэл ажилтай газар дээр нь танилцах зорилготой “Иргэн төвтэй төрийн үйлчилгээ-иргэдээ сонсъё” Эрх зүйн хөтөч өдөрлөг Алаг-Эрдэнэ суманд амжилттай зохион байгуулагдлаа. Маргааш Хатгал тосгон, Ханх суманд үргэлжилнэ.
Эх сурвалж: Хөвсгөл аймгийн ЗДТГ
