Кувейтын Үндэсний Ассамблейн даргатай уулзжээ

УИХ-ын гишүүн, Хүн амын хөгжил, нийгмийн хамгааллын сайд, УИХ дахь Монгол-Кувейтын парламентийн бүлгийн дарга С.Эрдэнэ, УИХ-ын гишүүн, УИХ дахь Монгол-Кувейтын бүлгийн гишүүн Су.Батболд нар өнгөрсөн мягмар гарагт Кувейтын Үндэсний Ассамблейн дарга Марзук Али Аль Ганимтай уулзалт хийжээ.

Уулзалтын эхэнд Кувейтын Үндэсний Ассамблейн дарга Марзук Али Аль Ганим Монгол-Кувейт хоёр улсын харилцаа жил ирэх бүр өргөжин хөгжиж байгааг онцлоод энэхүү харилцаанд хууль тогтоох дээд байгууллага, тэдгээрийн парламентийн бүлэг хоорондын харилцаа үнэтэй хувь нэмэр оруулсаар ирснийг хэлсэн байна.

УИХ-ын гишүүн, Хүн амын хөгжил, нийгмийн хамгааллын сайд С.Эрдэнэ Монгол, Кувейтын уламжлалт найрсаг харилцаа, хамтын ажиллагаа дан ганц улс төр, эдийн засгийн салбарт бус бусад олон салбарт хөгжих боломжтойг онцложээ. Түүнчлэн хоёр орны харилцааны цаашдын хөгжилд бүлгийн даргын хувиар дэмжлэг үзүүлэн ажиллахаа мэдэгджээ.