Монгол шатарчин охин Унгар улсын аварга болж, ДАШТ-д орох эрх авлаа
Д.Нандин-Эрдэнэ тус тэмцээнд аваргалснаар өсвөрийн шатарчдын дэлхийн аварга шалгаруулах тэмцээнд оролцох эрхээ албан ёсоор авсан байна.
Мэдээллийн алба
Унгар улсын Эгэр хотод 7 дугаар сарын 23-31-нд болсон Унгар улсын өсвөрийн шатарчдын аварга шалгаруулах тэмцээний шигшээ шатанд 14 хүртэлх насны охидын ангилалд өрсөлдсөн Дебрецен хот (DEAC) клуб, Champion professional online chess клубийн тамирчин Д.Нандин-Эрдэнэ нэг өргийн өмнө түрүүлэх болзлоо хангажээ.
Ийн Д.Нандин-Эрдэнэ тус тэмцээнд аваргалснаар өсвөрийн шатарчдын дэлхийн аварга шалгаруулах тэмцээнд оролцох эрхээ албан ёсоор авсан байна.
Энэ жил Унгар улсын өсвөрийн шатарчдын аварга шалгаруулах тэмцээний шигшээ шатанд 5 дахь удаагаа өрсөлдөж анх удаа түрүүлж буй Д.Нандин-Эрдэнэ өмнө нь мөнгөн медаль нэг, хүрэл медаль хоёр удаа хүртэж байжээ.
