Монгол Улсын 2013 оны төсвийн гүйцэтгэлийг баталлаа

УИХ-ын нэгдсэн чуулганаар Монгол Улсын 2013 оны төсвийн гүйцэтгэлийг батлах тухай УИХ-ын тогтоолын төслийн хоёр дахь хэлэлцүүлгийг хийв.

Төсвийн зарлагын хяналтын дэд хорооны танилцуулгыг УИХ-ын гишүүн Ж.Эрдэнэбат, УИХ дахь МАН-ын бүлгийн дүгнэлтийг УИХ-ын гишүүн Ч.Хүрэлбаатар нар танилцууллаа.

Танилцуулгатай холбогдуулан УИХ-ын гишүүн Ё.Отгонбаяр асуулт асууж хариулт авсны дараа Төсвийн зарлагын хяналтын дэд хорооны хуралдаанаар дэмжсэн зарчмын зөрүүтэй саналаар санал хураалт явуулсныг гишүүдийн олонх дэмжив.

Ингээд Төсвийн зарлагын хяналтын дэд хорооны саналаар тогтоолын төслийг батлах нь зүйтэй гэсэн саналаар санал хураалт явуулж 72.9 хувийн саналаар дэмжигдлээ.

Монгол Улсын 2013 оны төсвийн гүйцэтгэлийг баталсантай холбогдуулан авах зарим арга хэмжээний тухай УИХ-ын тогтоолын төслийг батлах нь зүйтэй гэсэн саналаар санал хураалт явуулсныг 75 хувиар дэмжлээ.