Монгол Улсын баг “ABU Robocon 2021” тэмцээний дэд байрт орлоо

Ази, Номхон далайн бүсийн орнуудын өргөн нэвтрүүлгийн холбоо (ABU)–ноос зохион байгуулдаг “ABU Robocon 2021 China” олон улсын роботын тэмцээн өнөөдөр буюу 2021 оны 12 дугаар сарын 12-ны өдөр онлайнаар амжилттай зохион байгуулагдаж өндөрлөлөө. Тус тэмцээнд 11 орны 21 баг өрсөлдсөнөөс Монголын баг хоёр дахь удаагаа дэд байрын эзэн боллоо.

Тодруулбал, "ABU Робокон-2021" олон улсын роботын тэмцээнд Индонезийн баг Гран при шагнал хүртсэн бол, Шинжлэх ухаан технологийн их сургуулийн Мэдээлэл, холбооны технологийн сургуулийн баг дараагийн байрт шалгарлаа.

Ташрамд дуулгахад, Монгол Улсын үндэсний аварга шалгаруулах “ABU-Robocon 2021” роботын тэмцээнийг МҮОНРТ, Үндэсний батлан хамгаалахын их сургууль хамтран өнгөрсөн долоодугаар сард зохион байгуулсан бөгөөд Шинжлэх ухаан технологийн их сургуулийн Мэдээлэл, холбооны технологийн сургуулийн “Цахим алт” баг түрүүлсэн бол ҮБХИС-ийн “Аравт” баг аман хүзүүдсэн билээ.