“Монголын дуу хоолой” гадаад нэвтрүүлгийн хамт олон Кумамото мужийнханд хандив өргөв

Байгалийн гамшигт нэрвэгдээд байгаа Японы Кумамото мужийнханд зориулсан “Pray for Kumamoto” хандивын ажиллагаа 2016 оны тавдугаар сарын 5-ны өдөр “Porsche Ulaanbaatar” үзэсгэлэнгийн танхимд боллоо. Уг хандивын өдөрлөг нь байгалийн гамшигт нэрвэгдээд байгаа Японы ард түмэнд сэтгэлийн дэм өгч, туслалцаа үзүүлэх зорилготой зохион байгуулагдсан юм. “Хангарьд Ротаракт Клуб” болон “Их Эрэл” ТББ-аас зохион байгуулсан “Pray for Kumamoto” хандивын ажиллагаанд Япон Улсаас Монгол Улсад суугаа Онц бөгөөд Бүрэн эрхт Элчин сайд Шимизү Такэнори оролцож, газар хөдлөлтөөс үүссэн нөхцөл байдлын тухай мэдээлэл өгөв. Байгалийн гамшигт нэрвэгдсэн Японы ард түмэнд зориулж Монгол Улсын Засгийн газар 50 мянган ам.доллар хандивлахаар болсон байна.

Тус хандивын ажиллагаанд МҮОНР-ийн “Монголын дуу хоолой” гадаад нэвтрүүлгийн албаны хамт олон агаарын цэнхэр долгионоор байнгын харилцаа холбоотой байдаг Японы ард түмэнтэй сэтгэл зүрх нэгтэй байгаагаа илэрхийлж, хамт олноосоо цуглуулсан мөнгөн хандиваа өглөө. Түүнчлэн “АПУ”, “Бридж”, Скай ресорт, “Витавит” компани ивээн тэтгэгчээр оролцож, Тэрэлжээс Улаанбаатар хот руу завиар аялах, “Скай ресорт”-д шинээр баригдаж байгаа усан гулгуурт нэг өдөр тоглох, хиймэл болон байгалийн хаданд авирах, агаарын бөмбөлөгөөр хөөрөх, Поршегийн шинэ загварын машинаар Улаанбаатараас Тэрэлж хүртэл туршилтын жолоодлого хийж, үдийн зоог барих, нэг өдрийн морин аялал хийх эрх зэргийг дуудлага худалдаагаар худалдаалж, орлогыг Кумамото мужийн гамшигт нэрвэгдсэн Японы ард түмэнд хандивласан юм. Мөн өдөрлөгт хүрэлцэн ирсэн байгууллага, хувь хүмүүс хандив өргөж байлаа. Өдөрлөгийн үеэр ятгачин Ч.Мөнх-Эрдэнэ болон япон хэлний сургалттай “Шинэ Монгол” сургуулийн сурагчид ая, дуугаа өргөсөн юм.

Байгалийн гамшгийн талаар товч дурдахад, Япон улсын Кюүшү бүсэд 2016 оны дөрөвдүгээр сарын 14-ний өдрөөс үргэлжилж буй хүчтэй газар хөдлөлтүүдээс үүдэлтэй нуранги, байгалийн гамшиг удаа дараа үргэлжилж байгаа юм. Тус аралд өнгөрөгч дөрөвдүгээр сарын 14-28-ны хооронд нийт 1027 удаа газар хөдөлснөөс тус арлын Кумамото мужид хамгийн өндөр буюу 7.3 хүртэлх баллын газар хөдөлж өнөөдрийг хүртэл үргэлжилсээр байгаа билээ.

Япон улсад жилд дунджаар 1000 гаруй газар хөдлөлт болдог бол Кюүшү аралд 14 хоногийн дотор 1000 давсан газар хөдлөлт болоод байна. Үүний уршгаар Кумамото мужийн 424 хот суурин газарт олон тооны хүмүүс орон гэргүй болсны улмаас хорогдох газарт амьдарч байна. Мөн Асо галт уулын дэлбэрэлт үүсэх нөхцөл улам идэвхжиж байгаа юм. Цаг агаар дулаарч, гэрэл цахилгаангүй болсны улмаас хоол хүнсний хадгалалтын горим алдагдаж хорогдох байранд амьдарч буй хүмүүсийн дунд гэдэсний халдварт өвчин тархаж байна. Газар хөдлөлтийн сацуу 7 хоногийн турш хүчтэй бороо орсон нь аврах ажиллагааг улам хүндрүүлж, улмаар хөрсний нуралтыг ихээр нэмэгдүүлж, эвдрэлд орсон цахилгаан станцыг засварлахад бэрхшээл үүсгээд байна

Япон улс нь Монгол Улсад буцалтгүй тусламж үзүүлдэг тэргүүлэх орон юм. Тухайлбал:

- 2011 онд Улаанбаатар хотын усан хангамжийг сайжруулах төсөлд 3,305 сая иен
- 2009 онд Ерөнхий Боловсролын Сургуулиудын өргөтгөлд 3,262 сая иен
- 2009 онд Улаанбаатар хотын гүүрэн байгууламжийн төсөлд 3,658 сая иен
- 2015 онд Япон-Монголын сургалтын эмнэлгийн барилгын төсөлд 7,985 сая иенийн тусламж үзүүлж байсан.

Харин манай улс 2011 онд Японд болсон газар хөдлөлтөд Засгийн газраас 1 сая ам.доллар, 2500 ширхэг дулаан хөнжил хандивлаж, 67,000 хүн хандивын аянд нэгдэж тусламж дэмжлэг үзүүлсэн юм.