Монголын радиогийн сэтгүүлч, зохиолч, яруу найрагч Л.Мөнхтөрд Соёлын гавьяат зүтгэлтэн цол олголоо

Тулгар төрийн 2228 жил, Их Монгол Улс байгуулагдсаны 813 жил, Үндэсний эрх чөлөө, тусгаар тогтнолоо сэргээн мандуулсны 108 жил, Ардын хувьсгалын 98 жил, Ардчилсан хувьсгалын 30 жилийн ой, Атар газар эзэмшсэний 60 жилийн ойг тохиолдуулан Монгол Улсын Ерөнхийлөгч Х.Баттулга зарлиг гаргаж, өнөөдөр Төрийн ордонд Төрийн дээд цол, одон медаль гардуулсан. Энэ үеэр Соёлын гавьяат зүтгэлтэн цол, тэмдгээр Монголын радиогийн сэтгүүлч, зохиолч, яруу найрагч, МЗЭ-ийн болон “Алтан өд” шагналт, Хэл бичгийн ухааны доктор Лханаагийн Мөнхтөрийг шагналаа.

Шагнал гардуулсныхаа дараа Монгол Улсын Ерөнхийлөгч Х.Баттулга “Монголын Үндэсний радиогийн редактор, сэтгүүлч Лханаагийн Мөнхтөрд Монгол Улсын Соёлын гавьяат зүтгэлтэн цол олголоо. Л.Мөнхтөр 1978 оноос хөдөлмөрийн гараагаа эхэлсэн. 1992 оноос Монголын радиод сурвалжлагч, сэтгүүлч редактораар ажиллах хугацаандаа “Ургацын далай” хэмээх уламжлалт, газар тариалангийн мэдээ мэдээллийн нэвтрүүлэгт ажиллаж ирсэн. Мөн монгол адууны талаар судалгааны ажил олныг хэвлүүлсэн соёлын зүтгэлтэн юм. Газар тариалангийн талаарх “Ургадаг алт” хэмээх цувралыг найман удаа хэвлүүлжээ. Тариаланчдын амжилт үйлсийг сурталчлах, тариаланд тулгарч байгаа асуудлуудыг олон нийт, шийдвэр гаргагчдад хүргэхэд онцгой нөлөөлөл үзүүлж байсан сэтгүүлч мөн” гэсэн юм.

Ийн Соёлын гавьяат зүтгэлтэн, зохиолч, сэтгүүлч, яруу найрагч Л.Мөнхтөр Төрийн ордноос гарсны дараа Монголын үндэсний олон нийтийн радио, телевизийн Ерөнхий захирал Л.Нинжжамц, Байгууллагын хөгжлийн газрын захирал Т.Батзориг, Программын нэгдсэн хэлтсийн дарга М.Эрдэнэбат, МҮОНР-ийн Нэвтрүүлгийн хэлтсийн дарга Б.Баярсайхан нар хүлээн авч уулзаж, халуун баяр хүргэлээ. Дараагаар нь МҮОНР-гийн “Шинэ эрин” (одоогийн Нийгэм, эдийн засгийн ) редакцынх нь хамт олон хүлээн авсан юм.