Нислэгийн мэдээллийг гар утсаараа хүлээн авна

Манай улсын нислэгийн тоо ихэсч буй өнө үед нислэгийн хамгийн бодитой, найдвартай мэдээллийг цаг тухайд нь боломжит хэлбэрээр хүргэх шаардлага тулгарсан. Энэхүү хэрэгцээ шаардлагыг хангах үүднээс ИНЕГ-ын захиалгаар хэрэглэгчдэд гар утас, iPad, компьютер зэрэг орчин үеийн электрон хэрэгслүүдийг ашиглан SMS мессеж, ухаалаг утасны аппликэйшн, вэбсайтын тусламжтайгаар үнэн зөв, түргэн шуурхай мэдээлэл хүргэх программ боловсруулжээ.

Эхний ээлжинд иргэд гар утасныхаа мессежээр нислэгийн мэдээллийг хүлээж авах үйлчилгээг туршилтаар ажиллуулж эхэлсэн байна. Харин ирэх оны нэгдүгээр сарын 1-н гэхэд бүрэн ашиглалтад оруулж, бусад электрон хэлбэрээр мэдээлэл авах боломжийг бүрдүүлэх юм байна.