НҮБ-ын Ерөнхий ассамблейн онцгой чуулган өнөөдөр болно

НҮБ-ын Ерөнхий ассамблейн онцгой чуулган өнөөдөр болж, АНУ-ын Ерөнхийлөгч Доналд Трампын Иерусалемийн талаарх шийдвэрийг хүчингүй болгох тогтоол шийдвэрт санал хураалт явуулна.

Даваа гарагт болсон НҮБ-ын Аюулгүй байдлын хурал дээр Иерусалемийг Израйлын нийслэлээр хүлээн зөвшөөрсөн АНУ-ын Ерөнхийлөгчийн шийдвэрийг хүчингүй болгох тогтоолын төслийг Египетийн төлөөлөгч танилцуулан санал хураалт явуулсан ч, АНУ-ын талаас хориг тавьсан. Энэ хоригийн дараа НҮБ дахь Палистины байнгын төлөөлөгч Риад Мансур НҮБ-ын Ерөнхий ассамблейн онцгой чуулганыг хуралдуулах хүсэлт гаргасан билээ.

Энэ удаагийн онцгой хурал дээр Турк болон Иемений талаас тогтоолын төслөөр санал оруулж, санал хураалт явуулна. Энэ тухай НҮБ-ын диломат албаны эх сурвалж мэдээлэхдээ “Тогтоолын төслийг АНУ Израйлаас бусад ерөнхий ассамблейн дийлэнх гишүүд дэмжих магадлалтай. Ерөнхий чуулган дээр хэлэлцэх асуудалд аль ч улс хориг тавих эрхгүй” гэж тайлбарласныг хэвлэлүүд уламжилж байна.

Ерөнхий чуулганы шийдвэр нь заавал даган биелүүлэх тогтоол биш ч гэлээ, энэ тогтоолоороо гишүүн улсууд нэгдмэл санаатай байгаагаа харуулж буй юм байна.

Тиймээс хурлын үеэр чухам аль улсын төлөөлөгч АНУ-ын эсрэг санал өгөхийг анхааралтай ажиглах болно гэж НҮБ дахь АНУ-ын байнгын төлөөлөгч Никки Халей санууллаа.

Тэрбээр НҮБ-ын Ерөнхий чуулганы гишүүн улсуудад хандан илгээсэн мэдэгдэлдээ “АНУ-ын Ерөнхийлөгч Доналд Трамп пүрэв гарагт болох санал хураалтыг анхааралтай ажиглана. Мөн хэн бидний эсрэг санал өгснийг эргэж мэдэгд гэсэн хүсэлт, үүрэг даалгаврыг надад өгсөн” гэж бичсэн байна.