Орхон аймгийнхан эко уутны үйлдвэрлэлд анхаарна
Үүгээр ч зогсохгүй Баян-Өндөр сумын мэргэжилтэн тус бүр хоёр даавуун уут оёж, гялгар уутнаас татгалзахаар болжээ.
Мэдээллийн алба
Орхон аймгийн Баян-Өндөр сумаас гялгар уутыг орлуулах Эко уутны үйлдвэрлэлд анхаарч, төсөл боловсруулж, өрхийн үйлдвэрлэгчдээ дэмжиж байна. Мөн ЕБС-ын хөдөлмөрийн хичээлээр сурагчид эко уут оёж, нийгмийн эрэлтэд нийлүүлэх нь зөв гэж үзэж байна.
Энэ сарын 1-нээс эхлэн 0,33 мм хүртэлх зузаантай гялгар уутыг хэрэглээнээс халж, хэрэглэсэн аж ахуй нэгж, иргэнд зөрчлийн тухай хуулийн дагуу торгууль ногдуулна ч гэж заасан. Гэвч тухайн уутыг орлуулах үйлдвэрлэлт, нийлүүлэлт дутмаг байна. Иймд Баян-Өндөр сумаас Эко-Баян-Өндөр төсөл хэрэгжүүлж, даавуун болон цаасан уут үйлдвэрлэх төсөл боловсруулжээ.
Ингэснээр өрхийн үйлдвэрлэгчдийг бэлэн төслөөр дэмжиж, цаашид гялгар уутны хэрэглээг бүрэн халах боломжтой болно.Одоогийн байдлаар Баян-Өндөр сумын сум хөгжүүлэх сангаас зээл авсан хоёр ААН-д “Эко уут” үйлдвэрлэх чиглэл өгч, өрхийн үйлдвэрлэгчдийг дэмжиж байна.Мөн ЕБС-ын хөдөлмөрийн хичээлийг гялгар уутны хэрэглээг халах шийдэлтэй уяж, “Эко клуб” ажиллуулж эхэлсэн бөгөөд сурагчид хөдөлмөрийн хичээл дээрээ даавуун уут оёж, зах зээлд нийлүүлж, тодорхой хэмжээний хэрэгцээг хангах юм.
Үүгээр ч зогсохгүй Баян-Өндөр сумын мэргэжилтэн тус бүр хоёр даавуун уут оёж, гялгар уутнаас татгалзахаар болжээ.
