Орон нутгийн сонгуульд 15 мянган хүн өрсөлдөнө
Сум, дүүргийн Иргэдийн Төлөөлөгчдийн Хурлын 2016 оны ээлжит сонгууль ирэх аравдугаар сарын 19-нд болно.
Мэдээллийн алба
Сум, дүүргийн Иргэдийн Төлөөлөгчдийн Хурлын 2016 оны ээлжит сонгууль ирэх аравдугаар сарын 19-нд болно. Сонгуулийн ерөнхий хорооноос гаргасан сонгуулийн үйл ажиллагааг зохион байгуулах хуваарийн дагуу аймаг, дүүргийн сонгуулийн хороод нэр дэвшигчдээ бүртгэж дуусчээ.
Нийслэлийн есөн дүүрэг, 21 аймгийн 330 гаруй сум 1792 тойрогт хуваагдсан байгаа бөгөөд нийт 7006 мандатын төлөө 15209 хүн өрсөлдөхөөр бүртгүүлсэн байна. Өнөөдрийн байдлаар дүүргүүд санал өгөх хэсгийн болон мандатын тоог баталсан бөгөөд нийслэлийн есөн дүүрэгт 295 мандаттай. Үүнээс гадна нийслэлийн есөн дүүрэгт 38 бие даан нэр дэвшигч өрсөлдөхөөр байгаа.
Сонгуулийн хороод нэр дэвшигчдийн үнэмлэхийг санал хураалт явуулах өдрөөс 22 хоногийн өмнө буюу энэ сарын 29-ний дотор олгож дуусах бол нэр дэвшигчид сурталчилгаагаа аравдугаар сарын 1-нээс эхлүүлнэ.
Нэмж мэдээлэхэд, Сонгуулийн Ерөнхий Хорооны мэдээллийн санд бүртгэгдэн сургалтад хамрагдаж, гэрчилгээ авсан 22.000 орчим ажилтан байна. Түүнчлэн сонгуулийн бэлтгэл ажилд зориулж 13.9 тэрбум төгрөгийг улсын төсвөөс баталсан юм.
Эх сурвалж: Сонгуулийн ерөнхий хороо
