Орон сууцны найман хорооллын замыг шинэчилжээ

Нийслэлийн Баянзүрх дүүрэг, Налайх дүүрэгт энэ жил нийт 8 байршилд орон сууцны хорооллын дундах замыг шинэчилсэн байна.

Мөн замын хөдөлгөөний аюулгүй байдлыг хангах зорилгоор, 7 байршилд хурд сааруулагч, 5 газарт гэрлэн дохио нэмж суурилуулахаар төлөвлөсөн гэж Нийслэлийн авто замын газрын зам ашиглалтын байцаагч Энхбаатар мэдээллээ. Учир нь дээрх 2 дүүргийн иргэд, оршин суугчдын зүгээс байшин хорооллын дундах замын эвдрэл хэрээс хэтэрч, гэрлэн дохио, тэмдэг тэмдэглэгээгүй зам олон байгаа тухай УИХ-ын гишүүн Ж.Батзанданд уламжилсан байна. Энэ дагуу өнөөдөр УИХ-ын гишүүн Ж.Батзандан холбогдох албаны хүмүүсээс ямар ажил хийж байгаа талаар нь асууж тодруулсан юм. Ингээд Нийслэлийн авто замын газрын зам ашиглалтын байцаагч О.Энхбаатарийн өгсөн мэдээллийг хүргэе.