Оюутны дотуур байрны төлбөр 500 мянган төгрөгт хүрлээ

Орон нутгаас хотод ирж суралцдаг оюутнуудаас энэ жил 15 мянга нь дотуур байраар хангагдах боломжтой болж байгаа юм. Сургуулиудын дотуур байрны засвар дуусаагүй байгаа ч маргаашнаас оюутнуудаа бүртгэж эхлэхээр болжээ.

Дотуур байрны төлбөр энэ жил 50-100 мянган төгрөгөөр нэмэгдсэн байна. Тухайлбал, ШУТИС-ийн байрны төлбөр өнгөрсөн жил 180-210 хооронд байсан бол энэ жил ойролцоогоор 280-310 мянгад хүрчээ.

МУБИС-ийн дотуур байрны төлбөрийг тодорхой хэмжээгээр нэмэх шийдвэрийг сургуулийн ТУЗ-өөс гаргасан бөгөөд энэ долоо хоногт эцсийн байдлаар үнийг нь тогтоох гэнэ.

Харин МУИС-ийн дотуур байрны төлбөр нэмэгдээгүй, 250 мянга хэвээрээ байна. Мянган оюутны байр өнгөрсөн жил 400 мянга байсан бол энэ жил 500 мянган төгрөг болжээ.