Рэнь Жэнфэй: АНУ “Хуавэй” компанийн хүч чадлыг дутуу үнэлж байна

БНХАУ-ын харилцаа холбооны технологийн салбарт тэргүүлэгч “Хуавэй” компанийг үүсгэн байгуулагч Рэнь Жэнфэй энэ компанийн эсрэг АНУ-аас авч байгаа арга хэмжээтэй холбогдуулан тайлбар хийлээ.

Түүний хэлснээр АНУ хийсэн үйлдлээрээ энэ компанийн хүч чадлыг дутуу үнэлж байна гэжээ. “Бид АНУ-аас ирэх бодит хяналтыг аль нэг жилийн өмнөөс мэдэрсэн. Америкийн улстөрчид одоогийн энэ үйлдлээрээ “Хуавэй” компанийн хүчийг дутуу үнэлж байна” гэж тэрбээр Хятадын хэвлэлд өгсөн ярилцлагадаа дурджээ.

Түүнчлэн АНУ-ын шийдвэр энэ компанид томоохон нөлөө үзүүлэхгүй. Яагаад гэвэл “Хуавэй” компани тодорхой бэлтгэл арга хэмжээ авчихсан байсан гэж Рэнь Жэнфэй мэдэгдсэн байна.

Мөн дэлхийн нэг ч компани ойрын 2-3 жилдээ “Хуавэй”-г тавдугаар үеийн 5G технологиороо гүйцэж чадахгүй гэж тэрбээр тэмдэглэжээ. АНУ-ын Худалдааны яам “Хуавэй” компани болон түүний 70 салбарыг үндэсний аюулгүй байдалтай харшлах үйл ажиллагаа явуулсан гээд хар жагсаалтад оруулсан юм.

Үүний улмаас Хятадын компани АНУ-ын нутаг дэвсгэрт зохих зөвшөөрөлгүйгээр бизнес явуулах, түүнчлэн Америкийн технологиудыг худалдан авах боломжгүй болсон. Гэхдээ өчигдрөөс “Хуавэй” компанид бизнесээ эрхлэх түр зөвшөөрөл олгосон байна. Түр зөвшөөрөл наймдугаар сарын 19-нийг хүртэл үйлчилнэ.

АНУ-ын Ерөнхийлөгч Дональд Трамп үндэсний аюулгүй байдалд аюул заналхийлэл учруулж болзошгүй компаниудын үйлдвэрлэсэн харилцаа холбооны тоног төхөөрөмжийг АНУ-д хэрэглэхийг хориглосон зарлигт гарын үсэг зурсан. Энэ зарлигт “Хуавэй” компанийн нэрийг дурдаагүй ч эх сурвалжууд энэ компанид зориулан гаргасан зарлиг гэжээ.