“Робокон” тэмцээний үндэсний ялагчаар “Соронзон хүү” баг тодорлоо

МҮОНТ Ази номхон далайн бүсийн орнуудын өргөн нэвтрүүлгийн холбоо /ABU/ хамтран 12 дахь жилдээ “Робокон” тэмцээнийг зохион байгууллаа.
Ази номхон далайн бүсийн орнуудын соёл уламжлалыг таниулан сурталчлах, оюутан залуусын бүтээлч сэтгэлгээг хөгжүүлэх зорилготой оюун ухааны өрсөлдөөний их талбар болсон “Робокон-2013” олон улсын роботын тэмцээн ирэх намар Вьетнам улсад болно. “Ногоон дэлхийгээ аварцгаая” уриатай олон улсын тэмцээнд эх орноо төлөөлөн өрсөлдөх багийг шалгаруулах “Үндэсний роботын тэмцээн”-ийг МҮОНТ, Байгаль орчин ногоон хөгжлийн яамтай хамтран дөрөвдүгээр сарын 25-ний өдөр Монгол бөхийн өргөөнд зохион байгууллаа.
Үндэсний роботын тэмцээнд оролцогч багууд эх дэлхий болон саран дээр ургамлын үр суулгах даалгаврыг гүйцэтгэх гар болон автомат удирдлагатай 2 робот бүтээж өрсөлдлөө. Үндэсний роботын тэмцээнд техник технологийн мэргэжлээр суралцдаг их дээд сургуулийн оюутан залуусын 16 баг оролцож өөрсдийн оюун ухаан, хүч хөдөлмөрөөрөө бүтээсэн роботуудаа өрсөлдүүллээ. Тэмцээний сүүлийн шатанд КТМС-ийн “Соронзон хүү” баг өрсөлдөгч болох МУИС-ийн харьяа Мэдээллийн Технологийн Сургуулийн “Unitel-1” багийг цэвэр хожсоноор ялагч болсон бол Шилдэг гар удирдлагатай роботтой багаар МУИС-ийн харьяа Мэдээллийн Технологийн Сургуулийн “Unitel-1”, Шилдэг дизайнтай багаар ШУТИС-ийн харьяа МИС-ийн “Танан-1”, Шилдэг техникийн шийдэлтэй багаар ШУТИС-ийн харьяа Мэдээлэл, Холбооны Технологийн Сургуулийн “Telecom Mongolia”, Шилдэг хөгжөөн дэмжигчтэй багаар Батлан Хамгаалахын Их сургуулийн “Wall-E” тус тус шилдгүүдийг шалгарууллаа.