С.Одонтуяа Ардчилсан эмэгтэйчүүдийн холбоог удирдана

Ардчилсан эмэгтэйчүүдийн холбооны IV чуулган өчигдөр Төрийн ордонд болж, тэргүүнээ сонголоо. Ардчилсан эмэгтэйчүүдийн холбооны тэргүүнд 10 нэр дэвшигч өрсөлдөх эрхийн батламжаа гардан авсан байсан ч өчигдрийн чуулганы үеэр зургаан нэр дэвшигч нэрээ татаж авснаар дөрвөн эмэгтэйн дунд санал хураалт явуулсан.

Санал хураалт 18:00 цагийн үед дуусч “Алтангадас” фракцын Б.Ургамалцэцэг, “Шонхор” фракцын С.Одонтуяа нар ойролцоо санал авсан байна. Тодруулбал, УИХ-ын гишүүн С.Одонтуяа 13 төлөөлөгчийн саналаар илүү байсан ч сонгуулийн дүн маргаан дагуулсан тул дахин сонгууль явуулахаар болсон. Улмаар дахин явуулсан нууц санал хураалтад УИХ-ын гишүүн С.Одонтуяа Б.Ургамалцэцэгээс нэг хүний санал илүү авсан байна.

Ингэснээр С.Одонтуяа гишүүн ирэх сонгуульд АН-аас УИХ-д суух жагсаалтын эхэнд бичигдэх эрхтэй болж байгаа юм.