Сайншанд-Хамарын хийд чиглэлд зорчихгүй байхыг анхааруулж байна

Дорноговь аймгийн Сайншанд суманд 2020 оны 07-р сарын 25, 26-ны өдрүүдэд орсон хүчтэй аадар борооны улмаас Сайншанд-Хамарын хийд чиглэлийн хатуу хучилттай авто замын зарим хэсэг сэтэрч, их хэмжээний эвдрэл үүссэн байна. Үүнтэй холбогдуулан аймгийн Онцгой комисс газар дээр нь ажиллаж дараах шийдвэрийг гаргалаа.

Үүнд:

-Замыг засварлах зураг төсвийг яаралтай хийлгэж, шаардлагатай санхүүжилтийг шийдвэрлүүлэх;
-Дээрх чиглэлийн авто замын хөдөлгөөнийг хэвийн байдалд оруулах хүртэл тодорхойгүй хугацаагаар хязгаарлах;
-Эвдрэл үүсcэн зам болон тогтоол ус, шаврыг тойруулан шинээр түр зам гаргаж тээврийн хэрэгслийг нэвтрүүлэх;
-Түр зам гаргахад шаардлагатай санхүүжилтийг аймгийн Эрсдэлийн сангаас шийдвэрлэн “Дорноговь-АЗЗА” ТӨXК-иар шуурхай гүйцэтгүүлэхээр боллоо.

Иймээс иргэд, аялагчдад түр зам барих газарт лаг, шавар ихээр үүсч техник, тоног төхөөрөмж ажиллах боломж хязгаарлагдмал байгаа тул зам баригдаж дуустал Сайншанд-Хамарын хийд чиглэлд зорчихгүй байхыг анхааруулж байна.

Эх сурвалж: Дорноговь аймгийн Засаг даргын Тамгын газар