Сербиэс Унгар руу дүрвэсээр байна

2008 онд Сербиэс салан тусгаарлаж, тусгаар тогтнолоо зарласан Косовогийн иргэд Унгар луу шинэ амьдрал хайн дүрвэх болжээ. Өнөөг хүртэл хоёр улсын салан тусгаарлах яриа маргаантай байгаа билээ.

Косово улсын иргэд гэр бүл, үр хүүхдээ дагуулан ус хөлдөхөөс өмнөхөн усны суваг даган дүрвэдэг бөгөөд сүүлийн үед Унгар улсын хилийг хууль бусаар нэвтрэгсдийн тоо эрс нэмэгдэх болсон талаар "Reuters" агентлаг мэдээлэв.

Дүрвэгсдийн олонх нь чинээлэг улсад очин ажилд орон, амьдралаа дээшлүүлж, ядуурлаас гарах зорилготой ийнхүү улсаасаа гарах болжээ.

Косово, Сербийн салан тусгаарлах асуудлын санал хураалтаас хойш тус улсын эдийн засгийн байдал уналтад орж, эмх замбараагүй үйлдэл гарах болсон юм. Түүнчлэн Косовогийн хойд хэсгийн хотуудын хүн ам сүүлийн хэдэн сард 7 хувиар буурсан байна. Үүгээр ч зогсохгүй 5000 хүүхэдтэй байсан сургууль 400 гаруй хүүхэдтэй болжээ.

Дүрвэгсдийн ярьж буйгаар хил нэвтрэхийн тулд алхаж очоод, цааш такси эсвэл автобусанд сууж Сербийн нийслэл Белград хотод очдог байна. Энэ замыг туулахын тулд нэг хүн дор хаяж 15 евро төлөх ёстой аж.

Дашрамд дурдахад, 2013 онд Унгар улс 6000 хүнд орогнол өгсөн бол энэ оны нэгдүгээр сарын байдлаар 10 мянган хүнд орогнол өгчээ.