Шинэ Зеландад ижил хүйстнүүд гэрлэжээ

Шинэ-Зеландад анх удаа ижил хүйстний гэрлэлт болжээ. Линли Бендалл, Алли Ваникау нар нь 14 жилийн турш хамт амьдарсан бөгөөд 6-9 насны гурван хүүхэдтэй юм. Хүүхдүүд нь тэдний гэрлэлтийн төлөө “Гуйя бидний ээжийг гэрлүүлээч” гэсэн бичигтэй цаас барин зогссон байна.

Шинэ Зеландын Засгийн газар өнгөрсөн дөрөвдүгээр сараас ижил хүйстний гэрлэлтийн асуудлыг хэлэлцэж баталснаараа Ази номхон далайн орноос ижил хүйстний гэрлэлтийг хуулийн дагуу хүлээн зөвшөөрсөн анхны орон болжээ. Хосуудын хуримыг “Роторуа” музейд хийсэн ба музейн менежер Жоанна Доэрти “Манай музей хэдийгээр хуучин загвартай ч шинэ зүйлийг бид дэмжин ажиллах дуртай. Бидний хаалга хэний ч өмнө нээлттэй. Энэ хурим бол үнэхээр гайхалтай. Би ийм сайхан зүйлийн гэрч болж байгаадаа баяртай байна” хэмээжээ.