Тэжээвэр нохой бамбаруушаа дагуулсан эвштэй “тулалджээ”
Хүрэн баавгайн “гэнэтийн дайралт”-ын үеэр гэрийн эзэн хөлөө гэмтээсэн бол нохой нь багагүй шархтай хоцорсон байна.
Мэдээллийн алба
АНУ-ын Калифорни мужид хүрэн баавгайн тоо толгой ихэсчээ. Үүнээс үүдэн энэ сарын 10-нд Лос-Анжелос хотын захын дүүргийн нэгэн байшингийн арын хашаанд бамбаруушаа дагуулсан эвш “зочилжээ”. Тухайн үед гэрийн тэжээвэр нохой эвш болон бамбарууш руу дайрсан байна. Гэрийн эзэн ч гэсэн нохойгоо хамгаалахаар арга хэмжээ авчээ.
Энэ үеэр мужийн Зэрлэг байгаль, загас, ан агнуурын албаны ажилтнууд шуурхай ирснээр гэрийн эзэн болон нохой аврагдсан аж. Хүрэн баавгайн “гэнэтийн дайралт”-ын үеэр гэрийн эзэн хөлөө гэмтээсэн бол нохой нь багагүй шархтай хоцорсон байна. Харин мөнөөх эвш болон бамбаруушийг Зэрлэг байгаль, загас, ан агнуурын албаны ажилтнууд байгальд нь буцаан тавьжээ.
