Цахим спортын “Renewal” баг 16 мянган ам.долларын шагнал хүртлээ

Цахим спортын “Counter-Strike: Global Offensive” төрлөөр зохион байгуулагдах 300 мянган ам.долларын шагналын сантай “Funspark ULTI - 2021” тэмцээн энэ оны сүүлээр Хятад улсад зохион байгуулагдана.

Тус тэмцээнд шууд урилгаар гурван баг, “Funspark ULTI - 2020” тэмцээнийг тэргүүлэгч “BIG” болон “Extra Salt”, Европ бүсийн тэмцээний оноогоор тэргүүлэгч хоёр баг, Азийн бүсийн тэмцээний оноогоор тэргүүлэгч нэг баг оролцох аж.

Түүнчлэн оноо цуглуулах нийт 6 тэмцээн явагдах бөгөөд хоёр дахь тэмцээн болох "Asia Season - 2" энэ сарын 3-нд эхэлсэн. Уг тэмцээнд манай улсаас “Renewal”, “D13”, “Checkmate”, “BCO” болон хоёр монгол тамирчинтай “NKT” баг оролцож байна.

Ташрамд дуулгахад, Монголын “Renewal” баг өнгөрсөн долоо хоногт “DreamHack Open June - 2021 Asia” тэмцээний аваргын төлөөх тоглолтод нутаг нэгт “Checkmate” багийг хожсоноор 16 мянган ам.долларын мөнгөн шагнал, Европт цахимаар зохион байгуулагдах "IEM Fall - 2021" тэмцээнд оролцох эрхээ авсан билээ.