Түймрээс сэргийлэх зурвас хийжээ

Хил хамгаалах ерөнхий газар, БОНХАЖЯ-наас 2015 онд хилийн бүс нутагт хийсэн инженерийн ажлуудыг хүлээн авч хариуцсан хилийн ангид хүлээлгэн өглөө.

Хэнтий, Дорнод аймагт түймрээс хамгаалах зурвас сэргээх болон шинээр гаргах, ойн зурвас гаргах зэрэг томоохон дөрвөн ажлыг энэ жил гүйцэтгэсэн байна. Тодруулбал, Дорнод аймгийн Баян-Уул сумын хилийн хэсэгт БОНХАЖЯ-ны 78.3 сая төгрөгийн санхүүжилтээр 12.7 км урт, 30 метрийн өргөнтэй ойн түймрээс хамгаалах зурвас, Экосистемд түшиглэсэн дасан зохицох арга хэмжээг уур амьсгалын өөрчлөлтөд өндөр эрсдэлтэй голуудын сав газарт хэрэгжүүлэх нь төслийн санхүүжилтээр 10 метрийн өргөн, 74 км урттай түймрээс хамгаалах шороон зурвас, нийт 116.7 км урт шороон зурвас хийсэн байна.

Харин Хэнтий аймаг дахь хилийн 0287 дугаар ангийн хариуцсан хэсэгт буюу Биндэр суманд 11 м өргөн, 40 см гүн, 12 км урт, Дадал суманд 11 м-ийн өргөн, 40 см-ийн гүн, 8 км урт зурвасыг тус тус хийж гүйцэтгэсэн байна. Эдгээр ажлыг Хил хамгаалах ерөнхий газар, хилийн анги, БОНХАЖЯ, аймгуудын БОАЖ-ын газрын мэргэжилтнүүд хүлээн авч тухайн хэсгийг хариуцсан хилийн ангид хүлээлгэн өгсөн байна.

Мөн 10 сая төгрөгийн хөрөнгө оруулалтаар хилийн дугаар тэмдэгтийн чиглэлд 2014 онд хийгдсэн 250 км мөр хянах зурвасыг сэргээн, ургамлын эсрэг хор цацах ажлыг гүйцэтгэжээ. Ингэснээр үндэсний аюулгүй байдлыг хангах, хилийн зөрчлөөс сэргийлэх, орон нутгийн иргэдийн өмч хөрөнгийг хамгаалахад үйл ажиллагаанд илүү ахиц гарна гэж албаныхан үзэж байна.

Мөн Дорнод, Хэнтий аймагт хавар, намрын улиралд хуурайшилт ихтэйгээс үүдэн ой, тал хээрийн түймрийн гаралт их байдаг. Ийнхүү хилийн инженерийн байгууламжийг сайжруулснаар хил даван орж ирэх түймрийн гаралт ч буурах боломжтой ажээ.

Эх сурвалж: Хил Хамгаалах Ерөнхий газар