У.Хүрэлсүх: Эрхэмсэг Монголжингоо эхчүүд, эмэгтэйчүүддээ баярын мэнд хүргэе

Олон улсын эмэгтэйчүүдийн эрхийг хамгаалах өдрийг тохиолдуулан Монгол Улсын шадар сайд У.Хүрэлсүх мэндчилгээ дэвшүүлжээ.

“Аливаа улс үндэстний оршин байхын үндэс нь ард иргэдийнх нь амьдрал, гэр бүлийн аз жаргал байдаг. Гэр бүлийн бат бөх байхын тулгуур нь эмэгтэйчүүд та нар маань билээ. Та бүхний нинжин сэтгэл, холч ухаан төр түмний төлөөх үйл хэрэгт ч үлэмж их юм.

Эмэгтэйчүүдийн эрхийг хамгаалах энэ өдрийг эмэгтэйчүүдийн тэгш оролцоог хангах, эрх, эрх чөлөөг нь баталгаажуулах өдөр болгон тэмдэглэн ирсэн уламжлалтай. Энэ өдөр эмэгтэй хүний тэсвэр хатуужил, үрээ хайрлах эхийн сэтгэлээр бахархах учиртай.

Эрхэмсэг Монголжингоо эхчүүд, эмэгтэйчүүддээ “Олон улсын эмэгтэйчүүдийн эрхийг хамгаалах өдөр”-ийн мэндийг дэвшүүлье!

Монгол Улсын Шадар сайд Ухнаагийн Хүрэлсүх